پیرس پیرالمپکس: ریکارڈ 29 تمغوں کے ساتھ ہندوستان کی مہم اختتام پذیر

نئی دہلی: پیرس پیرالمپکس 2024 کی مہم اپنے اختتام کو پہنچی، جس میں ہندوستان نے اپنے بہترین کارکردگی کا مظاہرہ کرتے ہوئے مجموعی طور پر 29 تمغے جیتے ہیں، جن میں 7 طلائی، 9 نقرئی اور 13 کانسے کے تمغے شامل ہیں۔ یہ تعداد ہندوستان کے پیرالمپک کھیلوں کی تاریخ میں سب سے زیادہ ہے اور قوم کے لیے ایک قابل فخر لمحہ ہے۔

خیال رہے کہ پیرس پیرالمپکس 2024 کا ہندوستانی مہم اتوار کو اختتام پذیر ہوئی، جب پوجا اوجھا آخری کھلاڑی کے طور پر میدان میں اتریں۔ اوجھا خواتین کی کایاک 200 میٹر کے فائنل میں کوالیفائی نہ کر سکیں اور مقابلے سے باہر ہو گئیں۔ ان 29 تمغوں کی بدولت، ہندوستان پوائنٹس ٹیبل میں 18 ویں مقام پر رہا۔ دوسری جانب، پاکستان جو اس ایونٹ میں شریک تھا، صرف ایک کانسی کے تمغے کے ساتھ 79 ویں مقام پر مشترکہ طور پر آخری پوزیشن پر رہا۔

ہندوستانی کھلاڑیوں نے اپنی شاندار محنت اور عزم کے ذریعے عالمی سطح پر اپنی موجودگی کو مضبوط کیا ہے۔ مختلف کھیلوں میں ہندوستانی کھلاڑیوں نے شاندار کارکردگی کا مظاہرہ کیا، جن میں ایتھلیٹکس، سوئمنگ، اور شوٹنگ شامل ہیں۔ ان کھیلوں میں کھلاڑیوں نے نہ صرف ذاتی بلکہ عالمی سطح پر بھی نئے ریکارڈ قائم کیے، جو کہ ان کی محنت اور لگن کا نتیجہ ہیں۔

ہندوستان نے 2024 کی پیرالمپکس مہم میں شاندار کارکردگی کا مظاہرہ کیا اور سوئٹزرلینڈ، بیلجیم، جنوبی کوریا، ترکی، ارجنٹائن جیسے بڑے نام والے ممالک کو پیچھے چھوڑتے ہوئے پیرس پیرا گیمز میں دنیا کے ٹاپ 20 ممالک میں شامل رہا۔

ہندوستان کے مقابلے میں پیرالمپکس کے روایتی ٹاپ ممالک جیسے چین، برطانیہ، امریکہ، اٹلی نے بھی شاندار کارکردگی کا مظاہرہ کیا اور ٹاپ 10 ممالک میں جگہ بنائی۔ پیرس میں بہترین کارکردگی کا مظاہرہ کرنے کے بعد ہندوستان 2028 کے لاس اینجلس پیرا گیمز میں مزید بہتر کارکردگی کا مظاہرہ کرنے کا خواہاں ہے۔