پیرس اولمپکس اختتامی تقریب: 100 سے زیادہ عالمی شہرت یافتہ فنکار دیں گے پرفارمنس، آسمان میں ہوگا لائیو شو

26 جولائی سے شروع ہونے والا پیرس اولمپکس 2024 اب اپنے اختتام کو پہنچ چکا ہے۔ افتتاحی تقریب کی طرح ہی اب اس کے اختتامی تقریب پر بھی پوری دنیا کی نظر ہوگی۔ جس طرح افتتاحی تقریب کے وقت کھلاڑیوں کی پریڈ سین ندی پر کرائی گئی تھی اب اختتامی تقریب کے دوران کیا کچھ نیا ہونے والا ہے اس کی جستجو شائقین میں ہے۔ تقریب میں 100 سے زیادہ عالمی شہرت یافتہ فنکار اپنی پرفارمنس دیں گے جس میں ایکروبیٹ، ڈانسر اور سرکس کے آرٹسٹ شامل ہیں۔ موسیقی کی تقریب میں اِسنوپ ڈاگ، سیلن ڈیون، بِلی اِلیش اور ریڈ چلی پیپرس نامی راک بینڈ اپنی پرفارمنس دینے والے ہیں۔ اختتامی تقریب کے آرگنائزرس نے اس سلسلے میں جانکاری دی۔

اختتامی تقریب پیرس کے سب سے بڑے اسٹیڈیم اسٹاڈ ڈی فرانس میں منعقد ہوگی۔ اس اسٹیڈیم میں ایک ساتھ تقریباً 80 ہزار افراد کے بیٹھنے کی صلاحیت ہے۔ ہندوستانی وقت کے مطابق 12 اگست کو رات 12.30 بجے اختتامی تقریب کا آغاز ہوگا جو 2 گھنٹے تک چلنے کا امکان ہے۔

تقریب میں پرانی روایت کے تحت 2028 لاس اینجلز اولمپکس کے آرگنائزرس کو اولمپک کا پرچم دیا جائے گا۔ اس کے علاوہ امریکی موسیقار ‘HER’ امریکی قومی ترانہ (National Anthem)  گائیں گی۔ آسمان میں بھی پرفارمنس ہوگی۔ افتتاحی تقریب کی طرح ہی اس میں بھی ایک ڈاکیومنٹری دکھائی جائے گی جس میں ماضی، حال اور مستقبل کی ایک جھلک ہوگی۔

ہندوستان کی بات کی جائے تو جہاں ایک طرف افتتاحی تقریب میں پی وی سندھو اور شرت کمل کو پرچم بردار بنایا گیا تھا تو وہیں اختتامی تقریب میں منو بھاکر اور پی آر شریجیش کو ملک کا پرچم بردار بنایا گیا ہے۔ منو بھاکر نے 2 برانز میڈل جیتے ہیں جبکہ شریجیش برانز میڈل جیتنے والی ہاکی ٹیم کا حصہ رہے ہیں۔