پیرس اولمپک 2024: خاتون شوٹر منو بھاکر نے دی ہندوستان کو پہلی خوشخبری، 10 ایم ایئرپسٹل کے فائنل میں داخل

پیرس میں جاری اولمپک 2024 میں ہندوستان کے لیے پہلی خوشخبری سامنے آئی ہے۔ خاتون شوٹر منو بھاکر نے 10 ایم ایئر پسٹل کے کوالیفائنگ مقابلے میں تیسرا مقام حاصل کرتے ہوئے فائنل میں داخلہ پا لیا ہے۔ انھوں نے اپنی بہترین کارکردگی کا مظاہرہ کرتے ہوئے 27 مرتبہ 10 پوائنٹس پر نشانہ لگایا، جو کہ اس مقابلے میں شامل سبھی کھلاڑیوں میں بیشتر ہے۔ انھوں نے مجموعی طور پر 60 نشانے لگائے جس میں 580 پوائنٹس حاصل ہوئے۔ ہنگری کی میجر ویرونیکا اور کوریا کی اوہ یے جِن 582-582 پوائنٹس کے ساتھ پہلے اور دوسرے مقام پر رہیں۔

10 ایم ایئر پسٹل کے کوالیفائنگ مقابلے میں ہندوستان کی خاتون شوٹر سانگوان رِدم نے بھی حصہ لیا تھا، لیکن وہ بدقسمت رہیں اور کوالفائنگ مقابلے میں ہی باہر ہو گئیں۔ انھوں نے 60 نشانے لگاتے ہوئے 573 پوائنٹس حاصل کیے اور 15ویں مقام پر رہیں۔ فائنل میں انٹری کے لیے آٹھویں مقام تک رینکنگ حاصل کرنا ضروری تھا جس سے وہ 4 پوائنٹس پیچھے رہ گئیں۔ دوسری سیریز میں لگائے گئے 10 نشانوں نے انھیں فائنل سے دور کر دیا، کیونکہ انھوں نے اس سیریز میں 100 میں سے محض 92 پوائنٹس حاصل کیے۔ 6 نشانوں میں انھوں نے 9-9 پوائنٹس حاصل کیے جبکہ ایک نشانہ 8 پوائنٹس پر لگا۔

جہاں تک 10 ایم ایئر پسٹل کے خاتون زمرہ سے فائنل میں پہنچنے والے کھلاڑیوں کی بات ہے، ہندوستان، ہنگری اور کوریا کے علاوہ چین، ویتنام اور ترکی کے کھلاڑیوں نے بہتر کارکردگی پیش کر رسائی حاصل کر لی ہے۔ چین اور کوریا کی 2-2 کھلاڑیوں نے فائنل میں داخلہ حاصل کیا ہے، باقی ممالک کی ایک ایک کھلاڑی کوالیفائی کر پائی ہیں۔ فائنل مقابلہ 28 جولائی یعنی کل ہندوستانی وقت کے مطابق 4 بجے کھیلا جائے گا۔