ہاکی ایشین چمپئنز ٹرافی: ہندوستان نے حاصل کی لگاتار پانچویں فتح، پاکستان کو 1-2 سے دی شکست

ہندوستانی ہاکی ٹیم نے پیرس اولمپک کا فارم اب تک برقرار رکھا ہے اور ایشین چمپئنز ٹرافی میں جیت کا سلسلہ جاری ہے۔ چین میں ہو رہے ایشین چمپئنز ٹرافی میں ہندوستانی ٹیم نے ایک بار پھر زوردار کھیل کا مظاہرہ کیا اور لگاتار پانچویں جیت حاصل کر لی ہے۔ گروپ اسٹیج کے آخری مقابلے میں ٹیم نے پاکستان کو 1-2 سے شکست دے دی۔ اس ٹورنامنٹ میں ہندوستانی ٹیم اب تک ایک بھی میچ نہیں ہاری ہے۔

آج کپتان ہرمن پریت سنگھ ٹیم کی جیت کے ہیرو رہے جنھوں نے پنالٹی کارنر کے ذریعہ دو گول داغے۔ حالانکہ پہلا گول پاکستان کی طرف سے ہوا تھا، لیکن پھر ہندوستانی ٹیم نے ایسی واپسی کی کہ آخر تک حریف ٹیم پر حاوی نظر آئی۔ ہندوستان اور پاکستان کے درمیان 350 دن بعد کھیلے جا رہے اس مقابلے میں پاکستان نے کھیل شروع ہوتے ہی حملہ شروع کر دیا تھا اور ساتویں منٹ میں حنان شاہد کی مدد سے گول داغ کر 0-1 کی سبقت لے لی تھی۔ حالانکہ ہندوستان نے واپسی کرنے میں تاخیر نہیں کی۔ ہندوستانی کپتان ہرمن پریت سنگھ نے 13ویں منٹ میں ہندوستان کے لیے پہلا گول داغا اور ٹیم کو 1-1 کی برابری پر لا کھڑا کیا۔

ہندوستانی ٹیم کو دوسرے کوارٹر میں کھیل کے 19ویں منٹ کے دوران پھر سے پنالٹی کارنر ملی، جس کا فائدہ اٹھاتے ہوئے ہندوستان کے ’سرپنچ‘ نے اپنی ٹیم کے لیے دوسرا گول داغ دیا۔ یہاں ہندوستانی ٹیم پاکستان سے آگے نکل گئی اور پھر 1-2 کا یہ اسکور آخر تک برقرار رہا۔ ویسے تیسرے کوارٹر میں ہندوستان کو کھیل کے 38ویں منٹ میں پنالٹی کارنر ملی تھی، لیکن کپتان ہرمن پریت نے ہیٹ ٹرک کا موقع گنوا دیا۔ اس کے بعد بھی تیسرے اور چوتھے کوارٹر میں ہندوستانی ٹیم کو کچھ مواقع ملے، لیکن وہ اسے گول میں تبدیل نہیں کر پائے۔

دوسری طرف پاکستانی ٹیم لگاتار جدوجہد کرتی ہوئی نظر آئی۔ انھوں نے برابری کے کئی مواقع گنوا دیے۔ کھیل کے دوران پاکستان کے ابو محمود کا گھٹنا مڑ گیا اور وہ سنگین طور سے زخمی ہو گئے۔ انھیں اسٹریچر پر باہر لے جانا پڑا۔ اس سے پاکستانی ٹیم کو شدید نقصان پہنچا۔

اس میچ کے دوران ہائی وولٹیج ڈراما بھی دیکھنے کو ملا۔ دونوں ٹیموں کے کھلاڑیوں میں زور دار بحث دیکھنے کو ملی اور کھلاڑی ایک دوسرے سے لڑتے نظر آئے۔ میچ کو ہر حال میں جیتنے کی کوشش میں دونوں ٹیموں کے کھلاڑیوں نے کچھ غلطیاں بھی کیں جس کی وجہ سے امپائرس نے انھیں یلو کارڈ دکھایا۔ پاکستان کے دو کھلاڑی سسپنڈ ہوئے، جبکہ ہندوستان کی طرف سے ایک کھلاڑی کو سسپنشن کا سامنا کرنا پڑا۔