'مردہ' خاتون تابوت میں زندہ پائی گئیں

ایکواڈور میں 76 سالہ ایک خاتون بیلا مونٹویا کو گزشتہ ہفتے فالج کے مشتبہ حملے کے بعد مردہ قرار دے دیا گیا تھا۔ تاہم تدفین سے قبل کفن پہنانے کے دوران انہیں سانس لینے کے لیے ہانپتے ہوئے پایا گیا۔

مونٹویا اب ہسپتال میں دوبارہ انتہائی نگہداشت والے وارڈ میں واپس آ گئی ہیں، جن کا علاج چل رہا ہے اور ایکواڈور کی وزارت صحت نے اس واقعے کی تحقیقات کے لیے ایک کمیٹی تشکیل دی ہے۔

ایک بیان میں وزارت صحت نے کہا کہ خاتون قلبی تنفس کے عارضے میں مبتلا ہو گئی تھیں، جس کی وجہ سے دل کی دھڑکن اور سانس لینے میں کمی آ جاتی ہے۔ بیان کے مطابق اس موقع پر ان کے قلب کی حرکت کو دوبارہ شروع کرنے کی کوشش بھی کی گئی تاہم، کوئی فائدہ نہیں ہوا، اسی لیے ڈیوٹی پر موجود ڈاکٹر نے ان کی موت کی تصدیق کر دی۔

مذکورہ خاتون کے بیٹے گلبر روڈولفو بالبران مونٹویا کے حوالے سے مقامی میڈیا نے اطلاع دی کہ ان کی والدہ کو ''صبح تقریبا 9 بجے ہسپتال میں داخل کیا گیا تھا اور دوپہر کے وقت ایک ڈاکٹر نے بتایا کہ وہ انتقال کر گئی ہیں۔''

اس کے بعد مونٹویا کو کئی گھنٹوں تک تابوت کے اندر رکھا گیا یہاں تک کہ خاندان کے افراد نے انہیں سانس لینے کی کوشش کرتے ہوئے دیکھ لیا۔ اس حوالے سے سوشل میڈیا پر پوسٹ کی گئی ایک ویڈیو میں انہیں ایک کھلے تابوت میں لیٹی دکھایا گیا ہے، جس میں وہ بھاری سانسیں لے رہی ہیں جبکہ ان کے ارد گرد کئی لوگوں موجود ہیں۔

اسی ویڈیو میں آگے دیکھا جا سکتا ہے کہ طبی عملہ وہاں پہنچتا ہے اور ان کا معائنہ کرتا ہے۔ اس کے بعد مونٹویا کو پہلے اسٹریچر پر اور پھر ایمبولینس میں لے جاتے ہوئے دیکھا جا سکتا ہے۔ اب وہ پھر سے اسی ہسپتال میں انتہائی نگہداشت والے وارڈ میں زیر علاج ہیں، جہاں ڈاکٹروں نے پہلے ان کی موت کا اعلان کر دیا تھا۔

خبر رساں ادارے اے ایف پی نے بالبران کے حوالے سے کہا: ''آہستہ آہستہ، میں سمجھنے کی کوشش کر رہا ہوں کہ آخر ہوا کیا تھا۔ اب میں صرف اپنی والدہ کی صحت کے لیے دعا کررہا ہوں۔ میں انہیں باحیات اپنے ساتھ چاہتا ہوں۔''