بوسنیا: پناہ گزینوں کے دو گروہوں کے مابین فائرنگ، ایک شخص ہلاک

ہفتے کے روز واقعے کی تصدیق کرتے ہوئے ملکی وزارت داخلہ نے بوسنی نیوز پورٹل Klix.ba کو بتایا کہ پناہ گزینوں کے دو گروہوں کے مابین تنازعے کے بعد فائرنگ کا تبادلہ ہوا جس کی وجہ سے ایک شخص ہلاک ہو گیا۔ مرنے والے تارک وطن کی شہریت سے متعلق تفصیلات نہیں بتائی گئیں۔ مقامی پولیس کے مطابق فائرنگ کا واقعہ جمعے کے شام چھ بجے پیش آیا۔

وزارت داخلہ کے ترجمان عدنان بیغانووچ کا کہنا تھا، ''پناہ گزینوں کے دو گروہوں کا، جن میں سے بظاہر ایک پاکستان اور دوسرا افغانستان سے تھا، بیہاچ کے مرکز میں شاپنگ سینٹر کے قریب تصادم ہوا۔ اس دوران آتشیں اسلحے کا استعمال بھی کیا گیا۔‘‘

وزارت داخلہ کے ترجمان نے مزید بتایا کہ فائرنگ کے نتیجے میں ایک شخص ہلاک اور ایک زخمی ہوا، جسے فوری طور پر ہسپتال منتقل کر دیا گیا۔ زخمی تارک وطن کے بارے میں انہوں نے کہا، ''زخمی شخص کو شدید جسمانی چوٹیں آئیں اور وہ ہسپتال میں زیر علاج ہے۔‘‘

حملہ آوروں کے بارے میں بتایا گیا کہ وہ اس واقعے کے بعد نامعلوم سمت میں فرار ہو گئے۔ مقامی پولیس اور تحقیقاتی ادارے ملزموں کی تلاش جاری رکھے ہوئے ہیں۔ پولیس عینی شاہدین کی تلاش بھی کر رہی ہے تاکہ ان کی مدد سے ملزموں تک پہنچا جا سکے۔

اقوام متحدہ کی ریفیوجی ایجنسی کے مطابق بوسنیا میں قریب چار ہزار پناہ گزین موجود ہیں، جن میں سے زیادہ تر کا تعلق افغانستان، پاکستانی اور ایران سے ہے۔

پناہ کی تلاش میں یورپ کا رخ کرنے والے ان افراد کی اکثریت بوسنیا کے شمال مغربی شہر بیہاچ کے قریبی علاقوں میں موجود ہیں۔ یہاں سے وہ یورپی یونین کے رکن ملک کروشیا کہ حدود میں داخل ہونے کی کوشش کرتے ہیں۔