مودی کی ’عظمت کے گیت گانے والے‘ ہندوستانی  وزراء شرمندہ ہو گئے

دارالحکومت نئی دہلی سے ملنے والی نیوز ایجنسی اے ایف پی کی رپورٹوں کے مطابق ہندوستانی وزراء کی کوشش تھی کہ وہ عوام کو سوشل میڈیا پر بتائیں کہ ہندو قوم پرست جماعت بھارتیہ جنتا پارٹی سے تعلق رکھنے والے وزیر اعظم مودی کی حکومت کتنے ’شاندار‘ کام کر رہی ہے۔ لیکن ان کوششوں کا نتیجہ یہ نکلا کہ، اے ایف پی کے مطابق، ان دونوں سیاست دانوں کے ’منہ شرم سے سرخ ہو گئے‘۔

تیز رفتار ٹرین تھی یا ویڈیو

؟

جن دو ہندوستانی وزراء کو یہ شرمندگی ہوئی، ان میں سے ایک ریلوے کے وفاقی وزیر پییُوش گوئل تھے۔ انہوں نے مودی کے ’میڈ ان انڈیا‘ کے سیاسی نعرے کو زیادہ مقبول بنانے کے لیے ایک ویڈیو سوشل میڈیا پر شیئر کیا۔ اس ویڈیو میں بظاہر ہندوستان کی پہلی تیز رفتار ریل گاڑی دکھائی گئی تھی، جو بہت زیادہ رفتار کے ساتھ سفر میں تھی۔

لیکن ٹوئٹر پر ہندوستانی صارفین نے اسی ویڈیو کی وجہ سے ریلوے کے وزیر کو شدید تنقید کا نشانہ بنانا شروع کر دیا کیونکہ ویڈیو میں ٹرین کی رفتار کو ایڈیٹنگ کے دوران اصل رفتار سے دوگنا تیز رفتار سے دوڑتے ہوئے دکھایا تھا۔

اس بارے میں ایک ہندوستانی صارف نے ٹوئٹر پر لکھا، ’’وزیر ریلوے کا بہت شکریہ! انہوں نے ویڈیو کو دوگنا رفتار سے چلا کر ٹرین کو سیمی ہائی اسپیڈ بنا دیا ہے۔ لیکن اگر وہ ایڈیٹنگ میں ویڈیو کو چھ گنا زیادہ رفتار سے چلاتے ہوئے ریکارڈ کر لیتے، تو یہی بھارتی ٹرین ایک انتہائی تیز رفتار ریل گاڑی بن جاتی۔‘‘

آخری رپورٹیں ملنے تک وزیر ریلوے نے خود اس پوسٹ پر کوئی کمنٹ نہیں کیا تھا لیکن یہ ویڈیو تب تک بھی سوشل میڈیا پر ان کی ٹائم لائن پر موجود تھا۔

ٹویٹس بھی الٹے پڑ گئے

دوسرے ہندوستانی وزیر جن کو نریندر مودی کی حمایت کرتے ہوئے شرمندگی کا سامنا کرنا پڑا، خزانے اور جہاز رانی کے جونیئر وزیر پون رادھا کرشن تھے۔ وہ ٹوئٹر پر اپنے پیغامات میں مودی حکومت کی بہت تعریف کرنا چاہتے تھے۔ لیکن غلطی سے انہوں نے ایسے کئی ٹویٹس میں تعریف کے بجائے مودی حکومت پر تنقید کر ڈالی۔

پون رادھا کرشن نے بغیر مندرجات پڑھے، جن ٹویٹس کو Modi4NewIndia# کا ہیش ٹیگ لگا کر ری ٹویٹ کیا، ان میں سے ایک ٹویٹ میں لکھا گیا تھا، ’’متوسط طبقے کے لیے بہتر فیصلے کرنا مودی حکومت کے ایجنڈے میں کہیں بہت نیچے ہے۔‘‘ اسی طرح ایک دوسری ٹویٹ یہ تھا، ’’مودی حکومت نے ماحولیاتی منصوبوں کی منظوری کے لیے جو آن لائن ٹریکنگ سسٹم متعارف کرایا ہے، اس کی وجہ سے منظوری کا وقت 600 دنوں سے کم ہو کر 1800 دن (دراصل تین گنا زیادہ) ہو گیا ہے۔‘‘

ہندوستان میں بہت سے ناقدین کا الزام ہے کہ وزیر اعظم مودی کی جماعت بی جے پی سوشل میڈیا پر ایک ایسی پراپیگنڈا مہم جاری رکھے ہوئے ہے، جس کا مقصد آئندہ عام انتخابات سے قبل عوامی سطح پر اس پارٹی کی ساکھ میں بہتری لانا ہے مگر خرابی یہ ہے کہ یہ مہم مبینہ طور پر بے بنیاد اور جھوٹے دعووں کے بل پر چلائی جا رہی ہے۔

میڈیا رپورٹوں کے مطابق بھارتیہ جنتا پارٹی نے اپنے ’آن لائن کارکنوں کی ایک فوج‘ بھی بنا رکھی ہے، جس کا کام صرف یہ ہے کہ وہ بی جے پی اور مودی کے سیاسی مخالفین پر سوشل میڈیا پر حملے کرے اور ان کی ساکھ کو نقصان پہنچائے۔