ترک پارلیمان میں کوکاکولا اور نیسلے کے فروخت پر پابندی

خبر رساں ایجنسی روئٹرز کے مطابق ایک سرکاری بیان اور ذرائع کے مطابق کوکا کولا اور نیسلے کی مصنوعات کو ترکی کی پارلیمان کے احاطے میں واقع تمام ریستورانوں، کیفیٹریاز اور قہوہ خانوں میں فروخت پر پابندی عائد کردی گئی ہے۔ تاہم کوکا کولا اور نیسلے کی مصنوعات ترکی میں دیگر مقامات پر معمول کے مطابق فروخت ہو رہی ہیں۔ دوسری طرف دونوں ملکوں کے درمیان باہمی تجارت بھی حسب معمول جاری ہے۔

ترک پارلیمان کی طرف سے جاری بیان میں کہا گیا ہے، "یہ فیصلہ کیا گیا ہے کہ ان تمام کمپنیوں، جو اسرائیل کی حمایت کرتی ہیں، کی مصنوعات پارلیمنٹ کے احاطے میں وقع ریستورانوں، کیفیٹیریاز اور قہوہ خانوں میں فروخت نہیں کی جائیں گی۔"

پارلیمان کے اسپیکر نعمان کرتلمس نے تاہم اپنے بیان میں کمپنیوں کی نشاندہی نہیں کی ہے۔ البتہ اس پیش رفت سے وابستہ ایک شخص نے خبر رساں ایجنسی روئٹرز کو بتایا کہ صرف کوکاکولا کی مشروبات اور نیسلے کی کافی کے فروخت پر پابندی عائد کی گئی ہے۔

انہوں نے بتایا کہ ایسا "اسرائیل کی حمایت کرنے والی ان کمپنیوں کے خلاف عوام کی زبردست ناراضگی" کے مدنظر کیا گیا ہے۔ ترک عوام اور کارکنوں کی ایک بڑی تعداد سوشل میڈیا پر اسرائیلی اشیاء اور ان مغربی کمپنیوں کے بائیکاٹ کا مطالبہ کر رہی ہیں جو غزہ پر اسرائیل کے حملے کی حمایت کرتی ہیں۔ کوکا کولا اور نیسلے نے فوری طورپر اس پیش رفت پر کوئی تبصرہ نہیں کیا ہے۔

اسرائیل اور عسکریت پسند گروپ حماس کے درمیان ایک ماہ سے زیادہ عرصے سے جاری جنگ کے درمیان کسی حکومت یا کسی بڑے ادارے کی جانب سے عالمی برانڈز کو نشانہ بنانے کا یہ پہلا معاملہ ہے۔ لیکن نہ تو ترک پارلیمان کے بیان میں اور نہ ہی پارلیمان کے ذرائع نے یہ وضاحت کی ہے کہ کوکا کولا اور نیسلے اسرائیل کی جنگ میں کس طرح مدد کررہی ہیں۔

نیسلے نے گزشتہ ماہ کہا تھا کہ وہ اسرائیل میں اپنے پروڈکشن یونٹوں میں سے ایک کو احتیاطاً بند کر رہا ہے۔ صدر رجب طیب ایردوان اور ان کی حکومت نے غزہ پر اسرائیلی حملے اور مغربی ملکوں کی جانب سے اس کی حمایت کی شدید مذمت کی ہے۔ ترکی نے گذشتہ ہفتے اسرائیل سے اپنے سفیر کو واپس بلالیا تھا۔ حالانکہ انقرہ کا کہنا تھا کہ سفیر کو صلاح و مشورے کے لیے بلایا گیا ہے۔ ترکی کے مختلف شہروں میں اسرائیل مخالف مظاہرے ہوئے ہیں، جن میں ہزاروں افراد نے حصہ لیا۔