توانائی بحران، جرمنی میں کرسمس کی لائٹیں بھی متنازعہ

جرمنی یوکرین جنگ کی وجہ سے پیدا ہونے والے توانائی کے بحران کے شکار ملکوں میں سے ایک ہے۔ ان حالات میں کرسمس کی روشنیاں اور کرسمس بازار بھی بحث کا موضوع بنے ہوئے ہیں۔

جرمنی میں کرسمس کا تہوار اپنی آب و تاب سے شروع ہوچکا ہے۔ وائٹ کرسمس کے آثار نظر آ رہے ہیں اور اس سال کی پہلی برف باری بھی ہو چکی ہے۔ ہر شہر میں کرسمس کے بازار سجے ہیں۔ مراکز میں جگمگاتے قمقموں اور کرسمس لائٹس کی جھالریں لٹکتی نظر آ رہی ہیں۔ یعنی کرسمس کا اصل روحانی احساس ہر طرف پایا جا رہا ہے۔

لیکن جرمنی میں توانائی کے بحرانکے سبب کرسمس لائٹوں سے لوگوں کی بے پناہ محبت کسی حد تک متنازعہ بن گئی ہے۔ عوامی مقامات پر آرائشی لائٹس کے ذریعے استعمال ہونے والی توانائی نہ صرف مہنگی ہے بلکہ اس کا یوکرین کی جنگ سے بھی گہرا تعلق ہے۔

کرسمس کے موسم کے آغاز سے بہت پہلے جرمنوں نے یہ بحث شروع کر دی تھی کہ اپنے اپنے گھروں کے سامنے یا صحن میں 'کرسمس لائٹیں لگانا‘ کتنا اخلاقی ہے؟ کیا واقعی یہ ضروری ہے کہ سانتا کلاز بالکونی سے لٹک رہا ہو یا جلتے بجھتے قمقموں سے آراستہ قطبی ہرن سجایا جائے؟

کرسمس کے موسم میں توانائی کو کس حد تک خرچ کیا جانا چاہیے اور کتنا نہیں؟ اس بارے میں جرمن عوام میں دو رائے پائی جاتی ہیں۔ ایک وہ لوگ ہیں، جو کہتے ہیں کہ یوکرین کی حمایت ظاہر کرنے کے لیے بجلی کے تمام غیر ضروری استعمال کو روک دیا جانا چاہیے۔ لیکن دوسروں کا کہنا ہے کہ کرسمس کی سجاوٹ کے ساتھ لوگوں کے حوصلے بلند کرنا، ایک دوسرے کو خوشی کا احساس دلانا ، خاص طور پر بحران کے وقت میں نہایت اہم ہے۔

جرمن ماحولیاتی تنظیم'انوائرمینٹل ایکشن‘ کے ایگزیکٹیو ڈائریکٹر یورگن ریش نے اس بحث کا آغاز یہ بتاتے ہوئے کیا کہ کرسمس کے موسم میں بجلی کی کھپت خاص طور پر زیادہ ہوتی ہے۔ انہوں نے ڈی ڈبلیو کو ایک انٹرویو دیتے ہوئے کہا کہ خاص طور پر اس سال بہت کم چراغاں کیا جانا چاہیے۔

ریش کے بقول، ''ایسا نہیں ہے کہ جرمنی میں کرسمس کے وقت اندھیرا چھا جانا چاہیے لیکن 'اسٹریٹ شاپنگ‘ کے لیے سڑکوں پر روشنیوں کی چکا چوند کرنے کی بجائے، جو بہت زیادہ بجلی استعمال کرتی ہیں، ہمیں ضروری چیزوں پر توجہ دینی چاہیے۔‘‘

ستمبر 2022 ء میں برلن سینیٹ نے اعلان کیا کہ وہ جرمن دارالحکومت کے ارد گردکرسمس کی روشنی کے اخراجات کی ادائیگی کے لیے عوامی فنڈز کا استعمال نہیں کرے گی۔ اس کا جواز توانائی کا بحران اور پیسہ بچانے کی ضرورت تھا۔

برلن کے مغربی حصے میں مشہور زمانہ Kurfürstendamm بولیوار کو سجانے والی ایک لاکھ چالیس ہزار 'ایل ای ڈی لائٹوں‘ کو گزشتہ ہفتے آن کیا گیا تھا لیکن یہ محض نجی عطیات کی بدولت ممکن ہوا۔ دوسری طرف 'اُنٹر ڈین لِنڈن‘ کے برلن بلیوار کے ساتھ لگے درخت اپنی معمول کی چمکتی ہوئی روشنیوں کے بغیر نظر آ رہے ہیں۔

جرمنی کے کچھ شہروں نے توانائی کی بچت کے لیے کرسمس بازاروں کے کھلنے کے اوقات کو مختصر کرنے کی حکمت عملی اپنائی ہے۔ جیسا کہ جرمنی کے شہر فولڈا میں ہفتے میں ایک دن بازاروں کو بند رکھا جاتا ہے۔

تاہم جرمن 'شومینز ایسوسی ایشن‘ اس تبدیلی کے نتیجے میں بجلی کی کوئی حقیقی بچت نہیں دیکھتی اور کرسمس بازاروں کی اہمیت کو ایک ایسا مقام سمجھتی ہے، جہاں لوگ جمع ہو سکتے ہیں اور مل سکتے ہیں، خاص طور پر مشکل وقت میں ایک دوسرے کے ساتھ اچھا وقت گزار سکتے ہیں۔

تاہم برلن کے ایک بہت ہی مشہور علاقے 'بیبل پلاٹس‘ کو توانائی کا بحران کسی صورت اثر انداز نہیں کر سکا۔ یہاں آنے والوں کے حوصلے پست نہیں کیےگیے۔ برلن کے اس خاص کرسمس بازار کا ماحول انتہائی خوشگوار ہے، جہاں دیگر کرسمس مارکیٹوں کے برعکس خوب جگمگاتی روشنیاں ہر طرف نظر آ رہی ہیں اور مارکیٹ کے بیچ و بیچ ایک بہت بڑا کرسمس ٹری نصب کیا گیا ہے۔ اس کی حسین سجاوٹ اور جگ مگ دیکھنے کے لیے لاتعداد ملکی اور غیر ملکی سیاح یہاں آتے ہیں۔

جرمن کرسمس مارکیٹیں جرمن ثقافت کی ایک بڑی علامت بھی ہیں۔ اس لیے جرمنی آنے والے غیر ملکی سیاحوں کے لیے کرسمس کا موسم غیر معمولی کشش کا باعث ہوتا ہے۔ جرمنی میں کرسمس سے پہلے کا وقت اپنی تمام مارکیٹوں اور روشنیوں کے ساتھ پوری دنیا کے سیاحوں کے لیے ایک مقناطیس کی حیثیت رکھتا ہے۔ چمکتی ہوئی کرسمس لائیٹیں اگر ضرورت سے زیادہ ہو جائیں تو انرجی کا خرچ یقیناً بڑھ جاتا ہے۔