جرمنی: ‘سوشل ڈسٹنسنگ‘ کرانے والے پولیس اہلکاروں پر حملے

جرمنی میں ایسٹر ویک اینڈ پر موسم خوشگوار ہونے کی وجہ سے بہت سے شہری گھروں سے نکلے تھے اور اس دوران زیادہ تر شہریوں کی جانب سے سماجی فاصلہ رکھنے کی حکومتی ہدایات پر عمل بھی کیا گیا۔ اس دوران تاہم جرمنی کے اقتصادی مرکز فرینکفرٹ میں پولیس پر اس وقت پتھراؤ کیا گیا اور آہنی راڈز سے حملہ کیا گیا، جب وہ سوشل ڈسٹنسنگ یا سماجی دوری اختیار کرنے کی ہدایات پر عمل کروانے کی کوشش کر رہی تھی۔

پولیس کے ایک بیان کے مطابق، ''پولیس اہلکاروں نے سڑک پر بہت سے افراد کو لاک ڈاؤن کی خلاف ورزی کرتے ہوئے دیکھ کر اپنی گاڑی روکی۔ اس موقع پر ایک جب ایک پولیس افسر گاڑی سے اترا تو وہاں پر موجود ایک گروپ نے پولیس کی گاڑی پر پتھراؤ کرنا شروع کر دیا۔‘‘

پولیس اہلکاروں نے اس گروپ کو پکڑنے کی کوشش کی تو وہ بچ نکلنے میں کامیاب ہو گیا۔ اس کے کچھ دیر بعد ایک اور پولیس افسر پر کم از کم بیس افراد نے اس وقت حملہ کیا، جب وہ اپنی گاڑی سے باہر نکل رہا تھا۔

پولیس کی جانب سے جاری کردہ بیان میں مزید کہا گیا،'' کچھ افراد کے ہاتھوں میں پتھر تھے، چھتوں پر لگائی جانے والی اینٹیں اور آہنی سلاخیں تھیں۔ یہ لوگ پولیس اہلکاروں کو ڈرا دھمکا رہے تھے۔ جب پولیس افسران نے ایک گروہ کا پیچھا کرنے کی کوشش کی تو ایک شخص نے تقریباﹰ پانچ کلو وزنی لوہے کا ایک ٹکڑا پولیس پر پھینکا، جو اپنے ہدف پر نہیں لگ سکا۔‘‘

ہیلی کاپٹر کی مدد سے کافی دیر تک جاری رہنے والی تلاش کے بعد پولیس نے چھ مشتبہ افرادکو ایک فلیٹ سے حراست میں لیا ہے۔ اس دوران اس فلیٹ سے تلواروں اور خنجروں سمیت چند دیگر ہتھیار بھی برآمد ہوئے ہیں۔