اطالوی سوشل میڈیا صارفین ملکی جج پر برہم کیوں ہیں

سترہ سالہ طالبہ کا الزام تھا کہ اسکول کی عمارت کے نگران نے انہیں عقب سے دبوچا، تاہم عدالتی فیصلے کے مطابق یہ حملہ چوں کہ فقط پانچ سے دس سیکنڈ طویل تھا، اس لیے حملہ کرنے والے شخص کو رہا کر دیا گیا۔

اس ٹین ایجر کا کہنا تھا کہ ملکی دارالحکومت روم کے ایک ہائی اسکول میں وہ سیڑھیوں پر اوپر کی جانب جا رہی تھی، جب اس حملہ آور نے اس کا ٹراؤزر کھینچا اور اپنے ہاتھ سے اس کے جسم کے نازک اعضاء کو چھونے کی کوشش کی۔ اس حملہ آور نے بھی اس واقعے کا اعتراف کیا تھا، تاہم اس کا کہنا تھا کہ اس نے ایسا فقط مذاقاﹰ کیا تھا۔ یہ واقعہ اپریل دو ہزار بائیس میں پیش آیا تھا۔

روم میں گزشتہ ہفتے اس مقدمے میں فیصلہ سناتے ہوئے عدالت نے کہا تھا کہ چوں کہ یہ حملہ 'فقط چند سیکنڈ‘ پر مبنی تھا اور جنسی نوعیت کا نہیں تھا اور چوں کہ اس کا دورانیہ انتہائی قلیل تھا، اسے لیے ''نازیبا‘‘ ہونے کے باوجود اس کے مذاق ہونے کی دلیل مضبوط دکھائی دیتی ہے۔

اس فیصلے کے بعد سوشل میڈیا پر اطالوی صارفین نے سخت ردعمل کا اظہار کیا۔ اداکار اور کامیڈین پاؤلو کامیلی نے ٹک ٹاک پر ایک ویڈیو میں دس سیکنڈ تک خود اپنی ہی چھاتی دبائی اور اس کے بعد کہا، ''اگر یہ جنسی حملہ نہیں ہے، تو پھر جنسی حملہ کس کو کہتے ہیں؟‘‘ اس ویڈیو کے بعد درجنوں مردوں اور خواتین نے اسی طرح اپنے سینے سہلاتے ہوئے بنائی گئی ویڈیوز میں دس سیکنڈ کی الٹی گنتی گنی۔

اسی طرح اس عدالتی فیصلے پر طنزیہ بنائی گئی ایک اور ویڈیو میں ایک خاتون ایک شخص پر اپنے کولہے دبانے کا الزام عائد کر رہی ہے، جس کے جواب میں وہ شخص کہہ رہا ہے کہ اس نے دس سیکنڈ سے کم وقت کے لیے اس خاتون کو چھوا ہے، اس لیے یہ کوئی جرم نہیں۔

اس عدالتی فیصلے پر خواتین کے حقوق کی تنظیموں نے بھی شدید تنقید کی ہے۔ خواتین کے حقوق کی اطالوی تنظیم ڈیفرینزا ڈونا کی صدر ایلسا ایرکولی نے کہا کہ یہ ہر اعتبار سے ایک جنسی حملہ تھا، ''جج نے یہ نہیں کہا کہ یہ واقعہ پیش نہیں آیا۔ جج نے اس واقعے کو تسلیم کیا اور اس کے باوجود کہا کہ یہ کسی خاتون کی تکریم پر حملہ نہیں ہے۔ ہم اس تشریح کو سمجھنے سے قاصر ہیں۔‘‘ انہوں نے کہا کہ یہ مقدمہ اس لیے بھی سنجیدہ نوعیت کا تھا، کیوں کہ یہ ایک اسکول کی عمارت میں پیش آیا، جہاں لڑکے اور لڑکیاں خود کو محفوظ تصور کرتے ہیں۔