برلن ایکویرئیم کے حادثے میں ’سینکڑوں مچھلیاں‘ بچا لی گئیں

جرمن دارالحکومت برلن کے ایک ہوٹل میں رکھا دیو ہیکل ایکویرئیم پھٹنے کے حادثے میں جہاں انواع اقسام کی سینکڑوں مچھلیاں ہلاک ہو گئی تھیں وہاں سینکڑوں کو بچا بھی لیا بھی گیا ہے۔ جمعہ 16 دسمبر کو ریڈیسن بلیو نامی ہوٹل میں رکھے گئے اس نام نہاد ایکواڈوم ایکویرئیم کے تباہ ہونے سے دو افراد زخمی بھی ہو گئے تھے۔

سیاحوں کی توجہ کے مرکز اس سمندری حیات کے نظارے کو ''دنیا کا سب سے بڑا فری اسٹینڈنگ سیلنڈریکل ایکویرئیم‘‘ کے طور پر سراہا جاتا تھا۔

ایکویرئیم کے پھٹنے کے وقت اس میں ایک اندازے کے مطابق 1500 مچھلیاں موجود تھیں۔ ان میں سے زیادہ تر مچھلیاں اس حادثے میں مر گئی تھیں۔ ہوٹل میں ٹھہرےمہمانوں نے ایکویرئیم کے زمین پر پڑے ملبے کے درمیان بہت سی مردہ مچھلیاں دیکھنے کی اطلاع دی تھی۔ ہوٹل کے سامنے برلن کی گلیوں میں بھی مردہ مچھلیاں پائی گئیں۔

مقامی این ٹی وی کی رپورٹ کے مطابق کھارے یا سمندری پانی کی مچھلی صرف ایک یا دو گھنٹے تک پانی سے باہر زندہ رہ سکتی ہے۔ پانی سے باہر ان کے گلپھڑے خشک ہونے لگتے ہیں اور وہ آکسیجن لینے سے قاصر ہو جاتی ہیں یعنی ان کا دم گھٹنے لگتا ہے۔

جمعہ کو برلن کے انتہائی ٹھنڈے درجہ حرارت نے بھی ان مچھلیوں کے زندہ رہنے کے امکانات کو کافی حد تک کم کردیا تھا۔ جب یہ حادثہ پیش آیا اس وقت برلن میں درجہ حرارت منفی سات ڈگری سینٹی گریڈ تھا۔

برلن فائر ڈیپارٹمنٹ کے مطابق کچھ مچھلیاں پانی کے ان چھوٹے چھوٹے جوہڑوں کی وجہ سے بچ گئیں جو اس ایکویرئیم کے ٹینک میں بھرے ایک ملین لیٹر پانی کے بہہ جانے کے نتیجے میں بن گئے تھے۔ فائر ڈیپارٹمنٹ نے ٹوئٹر پر لکھا کہ ٹینک کی باقیات میں ''کئی درجن‘‘ مچھلیاں زندہ پائی گئیں۔

ہوٹل کے تہہ خانے میں موجود 400 سے 500 کے درمیان چھوٹی مچھلیاں بھی بچ گئیں۔ حفاظتی وجوہات کی بنا پر عمارت کی بجلی منقطع کر دیے جانے کے بعد ان مچھلیوں کو دوسری جگہ منتقل کرنا پڑا۔ ان میں سے میٹھے پانی کی مچھلیوں کو برلن کے چڑیا گھر لے جایا گیا جبکہ کھارے پانی کی مچھلیوں کو سی لائف لے جایا گیا۔ سی لائف چین میں واقع آبی حیات کا ایک ایکویرئیم ہے، جس کی ایک شاخ برلن میں بھی ہے۔

سی لائف ایکویرئیم اسی عمارت کے احاطے میں واقع ہے جس میں ریڈین بلیو ہوٹل ہے جہاں تباہ ہونے والا ایکوا ڈوم بھی واقع تھا۔ تاہم سی لائف نے کسی نقصان کی اطلاع نہیں دی۔

جمعہ کی صبح 16 میٹر اونچے ایکویرئیم کی تباہی نے پانی، مچھلیوں، شیشے اور دیگر ملبے کو ہوٹل کی لابی اور برلن کی گلیوں میں بہا دیا تھا۔ اس تباہی کے وقت ہوٹل کے زیادہ تر مہمان لابی میں موجود نہیں تھے، جس کی وجہ سے شیشے ٹوٹنے سے صرف دو افراد زخمی ہوئے۔

ملبے کی صفائی کی کوششیں ہفتے کو مسلسل دوسرے روز بھی جاری رہیں۔ تفتیش کار اب ٹینک کے ٹوٹنے کی وجہ معلوم کرنے کی کوشش میں ہیں۔ حکام نے جمعہ کے روز کہا کہ انہیں یقین نہیں ہے کہ یہ تباہی کسی مجرمانہ فعل کی وجہ سے ہوئی ہے اور اس کی وجہ فوری طور پر واضح نہیں ہو سکی ہے۔

برلن کی میئر فرازِسکا گِفی کا کہنا تھا کہ ٹینک کی ''حال ہی میں تزئین و آرائش کی گئی تھی۔‘‘ تاہم دیگر حکام نے کہا کہ ابتدائی تحقیقات 18 سال پرانے ٹینک میں تعمیراتی مواد کے ممکنہ مسائل کی طرف اشارہ کرتی ہیں۔

برلن کے ریاستی وزیر داخلہ ایرس اسپرینجر نے خبر رساں ایجنسی ڈی پی اے کو بتایا، ''یقیناً تفتیش مکمل نہیں ہوئی ہے لیکن ابتدائی اشارے تعمیراتی میٹریل کے ناقص ہونے کی طرف اشارہ کرتے ہیں۔‘‘

''ڈوم ایکواری‘‘ عمارت برلن کیتھیڈرل سے صرف 350 میٹر کے فاصلے پر واقع ہے اور اس میں سی لائف ایکویرئیم کے ساتھ نام نہاد ایکوا ڈوم بھی ہے۔ یہ ایک بڑا ٹینک ہے جو تقریباً 1,500 انواع اقسام کی مچھلیوں کا گھر تھا۔ یہ ایکویرئیم ایک ملین لیٹر سمندری یاکھارے پانی سے بھرا ہوا تھا، جو کہ 1000 میٹرک ٹن وزنی پانی کے برابر تھا۔

DomAquaree ویب سائٹ کے مطابق ایک مقبول سیاحوں کی توجہ کا مرکز AquaDom ''دنیا کا سب سے بڑا فری اسٹینڈنگ سیلنڈریکل ایکویرئیم‘‘ ہے۔ ایکویرئیم میں 10 منٹ کی لفٹ سے سواری یہاں کی خاص باتوں میں سے ایک تھی۔