کووڈ جيل: قرنطينہ و قانون توڑنے والوں کے ليے جرمنی کا جواب

شمالی جرمنی کے چھوٹے سے شہر نوئے مؤُنسٹر کے نواح ميں ايک عمارت، جو نابالغوں کے حراستی مرکز کے طور پر استعمال ہونا تھی، اب کووڈ جيل بن چکی ہے۔ اس ميں چھ کمرے ہيں۔ جو کوئی قوانين پر عمل نہيں کرتا يا قرنطينہ توڑتے پکڑا جاتا ہے، اسے مرکز ميں مہمان بنايا جا سکتا ہے۔

جرمن رياست شلیسوگ ہولسٹائن کی مقامی انتظاميہ کے رکن زونکے شلس کے بقول وہ افراد جن پر کووڈ انيس ميں مبتلا ہونے کا شبہ ہو، ان کا تنہا رہنا وبا کے پھيلاؤ کو محدود رکھنے کے ليے لازمی ہے۔ انہوں نے جنوری ميں اس مرکز کے افتتاح کے موقع پر يہ بات کہی۔

يہ مرکز کہنے کو جيل ہے ليکن حقيقت ذرا مختلف ہے۔ يہاں قيام کرنے والوں کو ٹيلی وژن، ليپ ٹاپ، اسمارٹ فونز اور ديگر چيزيں استعمال کرنے کی اجازت ہے۔ ضرورت پڑنے پر نفسياتی امداد بھی فراہم کی جاتی ہے۔ تمام کمرے پرسکون بستروں سے آراستہ اور اتنے کشادہ ہيں کہ ان میں چہل قدمی کی بھی گنجائش ہے۔

بس ايک ہی چيز اس مرکز کو مختلف بناتی ہے اور وہ يہ ہے کہ يہاں خلاف ورزياں کرنے والوں کو جبراً اور ان کی مرضی کے خلاف رکھا جا سکتا ہے۔ چاليس کے قريب سابق پوليس افسران پر مشتمل محافظوں کی ايک ٹيم اس بات کو يقينی بناتی ہے کہ 'قيدی‘ مرکز کے قوانين پر عملدرآمد کريں۔

اس مرکز ميں لوگوں کو کب بھيجا جا سکتا ہے؟

جب اور کوئی راستہ نہ بچے، تب ہی حکام مذکورہ فرد کو اس مرکز ميں منتقل کر سکتے ہيں۔ يعنی اگر کووڈ انیس کا کوئی مریض اپنے گھر ميں قرنطينہ کرنے سے کئی مرتبہ منع کر چکا ہو۔ ايسے شواہد بھی لازمی درکار ہوتے ہيں کہ مذکورہ شخص نے قرنطينہ کی خلاف ورزی کی ہو۔ ايسی صورت ميں بھی پہلے پوليس مذکورہ شخص کے مکان کا دورہ کرے گی اور اس پر جرمانہ عائد کيا جائے گا۔ ايسا ايک سے زائد مرتبہ ہونے کی صورت ميں اسے اس مرکز منتقل کيا جا سکتا ہے۔

جرمنی ميں کووڈ جيل کا خيال نيا نہيں ہے۔ گزشتہ سال مئی ميں برلن کے شونے فيلڈ ايئر پورٹ پر چند کمروں کو اس مقصد کے ليے استعمال کیا گيا تھا۔ تاہم اس خيال پر جرمنی کی سولہ رياستيں منقسم ہيں۔ اب تک ايسے زيادہ تر مراکز خالی پڑے ہيں۔