مسلسل پانچويں مرتبہ سب سے خوش قوم، کون؟

فن لينڈ کو مسلسل پانچويں مرتبہ دنيا کا سب سے خوش ملک و قوم قرار ديا گيا ہے۔ اقوام متحدہ کی معاونت سے جاری کردہ 'ورلڈ ہيپینس رپورٹ‘ ميں عالمی سطح پر سب سے مطمئن اور خوش ممالک اور ناخوش ممالک کی درجہ بندی کی گئی۔

پانچ برس قبل 2018ء میں جب فن لينڈ کو پہلی مرتبہ سب سے خوش ملک و قوم قرار ديا گيا، تو کئی حلقوں ميں اسے شک کی نگاہ سے ديکھا گيا۔ فن لينڈ کے شہری ذرا خاموش طبيعت مانے جاتے ہيں اور عوامی سطح پر جذبات کے اظہار سے کتراتے ہيں۔ البتہ فن لينڈ کے جنگلات، وہاں عوام کو ميسر پبلک سروسز کا بلند معيار، حکام پر مکمل اعتماد، شفافيت اور جرائم اور عدم مساوات کی انتہائی کم شرح اس ملک کو خاص بنا ديتی ہيں۔

'ورلڈ ہيپينس رپورٹ‘ سالانہ بنيادوں پر گزشتہ دس سال سے جاری کی جاتی ہے۔ اس ميں معاشرتی و معاشی امور کے حوالے سے مطمئن يا غير مطمئن ممالک کی درجہ بندی کی جاتی ہے۔ تين سال کے ڈيٹا کا اوسط نکال کر ممالک کو ايک سے دس تک پوائنٹس ديے جاتے ہيں۔ رپورٹ ميں لوگوں کے ذاتی سطح پر خوشی يا اطمينان کا احساس، آزادی اور کرپشن کی صورتحال کو بھی مد نظر رکھا جاتا ہے۔

اس فہرست ميں شمالی يورپی ممالک ايک مرتبہ پھر سب سے خوش پائے گئے۔ فن لينڈ کے بعد ڈنمارک دوسرے اور آئس لينڈ تيسرے نمبر پر ہے۔ ان کے بعد سوئش اور ڈچ آتے ہيں۔ امريکا تين پوزيشن کی بہتری کے ساتھ سولہويں نمبر پر قرار رہا۔ برطانيہ سترويں پر جبکہ فرانس بيسويں پوزيشن پر رہا۔

افغانستان 146 ممالک کی فہرست ميں سب سے نچلی پوزيشن پر رہا۔ پچھلے سال اگست ميں طالبان کی عمل داری کے بعد سے افغانستان شديد معاشی مشکلات کا شکار ہے۔ يونيسف کے مطابق اگر ان تک مدد نہ پہنچی، تو رواں سال موسم سرما تک پانچ سال سے کم عمر کے ايک ملين بچے بھوک سے مر سکتے ہيں۔ رپورٹ کے شريک مصنف يان ايمونوئل دے نيوے کے بقول يہ انڈيکس يہ ثابت کر ديتا ہے کہ جنگ کس طرح لوگوں اور ان کی زندگيوں کو متاثر کرتی ہے۔ افغانستان سے صرف ايک پوزيشن اوپر لبنان ہے۔