دبئی ایکسپو: اسرائیل کے لیے عرب دنیا میں داخل ہونے کا موقع

دبئی ایکسپو 2020 نامی تجارتی میلے میں قریب 200 ممالک شرکت کریں گے جبکہ توقع ہے کہ چھ ماہ کے دوران 25 ملین لوگ اس تجارتی میلے کو دیکھنے کے لیے وہاں پہنچیں گے۔

زیادہ تر عرب ممالک کی طرح متحدہ عرب امارات کے بھی اسرائیل کے ساتھ سفارتی تعلقات نہیں ہیں۔ لیکن یہ یہودی ریاست غیر محسوس انداز سے مشترکہ سلامتی کے نام پر اور ایک مشترکہ دشمن ایران کے خلاف خلیجی عرب ریاستوں کے قریب ہوتی جا رہی ہے۔

حکام کے مطابق عرب ریاست کی میزبانی میں ہونے والی اس ایکسپو میں اسرائیلی پویلین عرب عوام تک پہنچنے اور ان کے ساتھ اسرائیل کے تعلقات معمول پر لانے کا ایک نادر موقع ہو گا۔

اسرائیلی وزارت خارجہ کی طرف سے دبئی ایکسپو 2020 کے لیے خصوصی اہلکار ایلازار کوہن Elazar Cohen کے بقول، ''ہمارے لیے ایک اور اضافی موقع عرب اور مسلمان وزٹرز بھی ہوں گے۔‘‘

اسرائیل اور عرب دنیا کے درمیان عوامی سطح پر ابھی تک انتہائی محتاط روابط ہیں مگر ساتھ ہی اسرائیلی کھلاڑیوں کو اب بتدریج خلیجی ممالک میں ہونے والے کھیلوں کے مقابلوں میں شرکت کی اجازت دی جانے لگی ہے۔

دبئی ایکسپو 2020 میں اسرائیلی پویلین کو ڈیزائن کرنے والے تل ابیب کے ماہر تعمیرات ڈیوڈ کنافو کے مطابق یہ ایکسپو ''ایسی ثقافتوں اور لوگوں کے درمیان ملاقات کا ایک نادر موقع ہو گا جو عام طور پر آپس میں نہیں ملتے۔‘‘

اس پویلین کو اس طرح ڈیزائن کیا گیا ہے کہ خطے کے ساتھ اسرائیلی لگاؤ کے اظہار کے ساتھ ساتھ اس یہودی ریاست کی طرف سے اپنے عرب ہمسایوں کے ساتھ کھلے پن کی خواہش کا اظہار ہو سکے۔ کنافو کے بقول، ''یہ پویلین دراصل ایک کھلی جگہ ہے ۔۔۔ ایک ڈرائنگ روم کی طرح جس میں ایکسپو کے سیر کے لیے آنے والے مہمانوں کی میزبانی کی جائے گی۔‘‘

اس پویلین کی تصوراتی ویڈیوز میں سیڑھیاں دکھائی گئی ہیں جو ریت کے ایک ٹیلے کی طرف جا رہی ہیں۔ یہ دراصل ایک ایسے پویلین کی نمائندگی ہے ''جس کی نہ کوئی دیوار ہے اور نہ کوئی سرحد‘‘ جبکہ سیڑھیوں کے ساتھ ساتھ ایل ای ڈی اسکرین پر اسرائیلی معاشرے کے مختلف پہلوؤں کو اجاگر کیا جائے گا۔

اسرائیلی وزیر اعظم بینجمن نیتن یاہو کے مطابق اسرائیلی ایکسپو پویلین ''عرب ریاستوں کے ساتھ تعلقات معمول پر لانے کی طرف مسلسل بہتری‘‘ کا اظہار ہو گا۔