'مودی اور شی باہمی تعلقات بحال کرنے پر متفق'، چین کا دعویٰ

جنوبی افریقہ کے شہر جوہانسبرگ میں برکس گروپ کے ملکوں کے قومی سلامتی کے مشیروں کی پیر کے روز میٹنگ ہوئی۔ بعد میں بھارت کے قومی سلامتی کے مشیر اجیت ڈوبھال نے چین کے اپنے ہم منصب وانگ ایی کے ساتھ تفصیلی تبادلہ خیال کیا۔ منگل کو وانگ ایی کو کن گینگ کی جگہ چین کا نیا وزیر خارجہ مقرر کیا گیا ہے۔

اجیت ڈوبھال اور وانگ ایی کی میٹنگ کے بعد چین کی وزارت خارجہ کی طرف سے منگل کو ایک بیان جاری کیا گیا۔ اس میں کہا گیا ہے کہ گزشتہ برس بالی میں جی 20 سربراہان کی میٹنگ کے دوران عشائیے پر صدر شی جن پنگ اور بھارتی وزیر اعظم نریندر مودی کے درمیان تفصیلی تبادلہ خیال بھی ہوا تھا جس میں دونوں رہنما باہمی تعلقات کو بحال کرنے پر "متفق" ہوگئے تھے۔

دونوں ملکوں کے درمیان سن 2020 میں سرحد پر ہونے والی جھڑپوں کے بعد سے یہ پہلا موقع ہے جب چین کی وزارت خارجہ نے اس طرح کا دعویٰ کیا ہے۔ حالانکہ باہمی تعلقات کو بحال کرنے کے لیے فوجی اور سفارتی سطح پر اب تک متعدد میٹنگیں ہوچکی ہیں لیکن دونوں ملکوں نے کسی اہم پیش رفت کے حوالے سے کوئی بیان نہیں دیا ہے۔

ڈوبھال اور وانگ ایی کی میٹنگ کے بعد بھارت کی طرف سے جاری بیان میں چین کے دعوے کا کوئی ذکر نہیں ہے۔ اس میں کہا گیا ہے کہ لائن آف ایکچوئل کنٹرول (ایل اے سی) پر جاری تعطل پر توجہ مرکوز رکھی اور ڈوبھال نے کہا کہ اس واقعے نے بھارت اورچین تعلقات کے عوامی اور سیاسی بنیادوں کو "تباہ" کر دیا۔

بھارتی وزارت خارجہ کی طرف سے جاری بیان میں کہا گیا ہے،" قومی سلامتی کے مشیر نے بھارت چین سرحد پر مغربی سیکٹر میں ایل اے سی پرسن 2020 سے جاری صورت حال پر بات چیت کی اور کہا کہ اس نے تعلقات کے اسٹریٹیجک اعتماد اور عوامی اور سیاسی بنیاد کو تباہ کر دیا ہے۔"

ڈوبھال اور وانگ ایی کی اس ملاقات سے قبل 14جولائی کو بھارت کے وزیر خارجہ ایس جے شنکر نے جکارتہ میں ایسٹ ایشیا سمٹ اور آسیان وزرائے خارجہ کی میٹنگ کے دوران چینی وزیر خارجہ وانگ ایی سے ملاقات کی تھی۔

اس میٹنگ کے بعد ایسی قیاس آرائیاں تیز ہوگئی ہیں کہ وزیر اعظم مودی اور صدر شی جن پنگ کے درمیان اگست میں کیپ ٹاون میں برکس سمٹ یا پھر دہلی میں جی 20سربراہان کی میٹنگ میں ملاقات ہو سکتی ہے۔ حالانکہ دونوں رہنماوں میں سے کسی نے بھی اس سلسلے میں اب تک تصدیق نہیں کی ہے۔

مودی اور شی جن پنگ کے درمیان اپریل 2020 میں ایل اے سی پر جھڑپ کے بعد سے اب تک کوئی براہ راست بات چیت نہیں ہوئی ہے۔ حالانکہ گزشتہ نومبرمیں بالی میں جی 20رہنماوں کے عشایئے کے دوران دونوں میں چند منٹوں کی علیک سلیک ہوئی تھی۔ لیکن چینی وزارت خارجہ نے اب دعویٰ کیا ہے کہ دونوں رہنماوں کی تفصیلی بات چیت بھی ہوئی تھی جس میں باہمی تعلقات کو مستحکم کرنے کے حوالے سے دونوں میں اتفاق ہو گیا تھا۔