چین میں بچے صرف ہفتے میں تین گھنٹے ویڈیو گیمز کھیل سکیں گے

چین میں حکام نے آن لائن گیمز سے متعلق نئے ضابطہ اخلاق کو مزید سخت کرنے کا فیصلہ کر لیا ہے۔ اس حوالے سے جو نئے اصول و ضوابط شائع ہوئے ہیں، اس کے تحت اٹھارہ برس سے کم عمر کے بچوں کو ہفتے میں تین گھنٹے سے زیادہ آن لائن ویڈیو گیمز کھیلنے کی اجازت نہیں ہو گی۔

دی نیشنل پریس اینڈ پبلیکیشن ایڈمنسٹریشن (این پی پی اے) نے اپنی ایک نئی نوٹیفیکیشن میں کہا ہے کہ بچے جمعے کی شام اور اواخر ہفتہ شام آٹھ بجے سے نو بجے کے درمیان گیم کھیل سکتے ہیں۔

ملک میں ویڈیو گیمز کے نگراں ادارے کی نئی ہدایات کے مطابق عام چھٹی کے دن بھی ایک وقت میں ایک گھنٹے سے زیادہ ویڈیو گیمزکھیلنے کی اجازت نہیں ہو گی۔ سابقہ ہدایات کے مطابق 18 برس تک کے بچوں کو ایک دن میں 90 منٹ تک ویڈیو گیمز کھیلنے کی اجازت تھی۔

چین کی حکمراں جماعت کمیونسٹ پارٹی ویڈیو اور آن لائن گیمز سے نوجوانوں کی بینائی متاثر ہونے اور غلط عادت پڑنے جیسے منفی اثرات کے حوالے سے کافی فکر مند رہی ہے۔ آن لائن ویڈیو گیمز دنیا کی دیگر بڑی منڈیوں کی طرح ہی ایک منڈی ہے جس سے دنیا کے لاکھوں نوجوان منسلک ہیں اور چین کی ان نئی ہدایات کو گیمنگ انڈسٹری کے لیے ایک بڑا دھچکا مانا جا رہا ہے۔

چین میں آڈیو- ویڈیو اینڈ ڈیجیٹل پبلشنگ ایسو سی ایشن کے مطابق اس برس کی پہلی سہ ماہی میں اس صنعت سے تقریبا ًبیس ارب ڈالر کی آمدنی ہوئی ہے۔ حکام نے ان آن لائن ویڈیو گیمز کو ''روحانی افیم'' قرار دیتے ہوئے کہا ہے کہ بچے اس کے عادی ہوتے جا رہے ہیں جس کا ان کی صحت پر بھی برا اثر پڑتا ہے۔ کہا جا رہا ہے کہ یہ نئے اقدامات معاشرے پر زیادہ گرفت حاصل کرنے کی بیجنگ کی کوششوں کا ایک حصہ ہے۔

چین میں آن لائن گیم کھیلنے کے لیے اپنی آئی ڈی سے رجسٹر کرنا ضروری ہوتا ہے یہ اس لیے بھی ضروری ہے تاکہ بچے اپنی عمر کے بارے میں جھوٹ کا سہارا نہ لے سکیں۔ اس کے ساتھ جو کمپنیاں اس طرح کے گیمز کی پیش کش کرتی ہیں ان پر کم عمروں کو ایسی خدمات مقررہ وقت سے زیادہ دیر کے لیے پیش کرنے کی بھی پابندی عائد ہے۔

چین کی حکومت نے علی بابا گروپ کی ٹیکنالوجی اور ٹینسیٹ جیسی کمپنیوں کے تئیں سخت موقف پہلے سے ہی اپنا رکھا ہے اور نئے اصول و ضوابط کے اعلان کے فوراً بعد ہی آن لائن ویڈیو گیم فراہم کرنے والی بڑی کمپنیوں کے شیئرز میں کافی گراوٹ درج کی گئی ہے۔