ایک اور سیاہ فام شخص کی امریکی پولیس کے ہاتھوں ہلاکت، مشیگن میں مظاہرہ

امریکی ریاست مشیگن کی پولیس کی طرف سے جاری کی گئی ویڈیو فوٹیج میں ایک پولیس آفیسر کو ایک سیاہ فام نوجوان کے سر پر گولی مار کر اُسے ہلاک کرتے دیکھا جا سکتا ہے۔ اس فوٹیج کے جاری کیے جانے کے بعد مشیگن کے شہریوں میں غم و غصے کی لہر دوڑ گئی۔ شہر گرینڈ ریپڈس میں سیاہ فام شہریوں کے خلاف امریکی پولیس کے مظالم اور نسل پرستانہ رویے کے خلاف سراپا احتجاج بنے ہوئے مظاہرین سڑکوں پر نکل آئے ۔ مظاہرین ' نو جسٹس، نو پیس‘ یعنی ' انصاف نہیں تو امن نہیں‘ کے نعرے لگا رہے تھے۔

یہ واقعہ چار اپریل کو اُس وقت رونما ہوا جب ایک امریکی پولیس آفیسر، جس کا نام ظاہر نہیں کیا گیا ہے، نے پیٹرک لییویا نامی ایک سیاہ فام شخص کے سر پر گولی مار کر اُسے ہلاک کر دیا۔ اس واقعے کی ویڈیو فوٹیج میں دیکھا جا سکتا ہے کہ پولیس آفیسر اور یہ شخص ایک دوسرے سے گتھم گتھا ہیں۔ پولیس آفیسر پیٹرک کی کمر پر سوار ہے۔ اس ویڈیو میں واضح طور پر اس پولیس افسر کو 26 سالہ پیٹرک کے سر پر گولی مارتے دیکھا گیا۔ یہ واقعہ پیٹرک لییویا کے گھر کے سامنے پیش آیا۔

دوسری ویڈیو فوٹیج میں دیکھا گیا کہ پولیس آفیسر نے ابتدائی طور پر لییویا کو ایک ایسے لائسنس کیساتھ گاڑی چلانے سے روکا جس کا تعلق اس گاڑی سے نہیں تھا۔ پولیس کی طرف سے پکڑنے جانے سے بچنے کے لیے شخص پولیس سے بھاگنے کی کوشش کر رہا تھا۔ گرینڈ ریپڈس کے نئے پولیس چیف ایرک ونسٹروم کے بقول لییویا پولیس آفیسر کے ٹیزر کو پکڑنے کی کوشش میں تھا۔ پولیس چیف ونسٹروم نے مزید کہا کہ انہوں نے شفافیت کی خاطر اس واقعے کی فوٹیج جاری کی۔ وہ کہتے ہیں، ''میں اسے ایک المیے کے طور پر دیکھتا ہوں۔ یہ میرے لیے ایک مسلسل اُداسی کا باعث ہے۔ ‘‘

پیٹرک لییویا اصل میں ڈیموکریٹک ریپیلک آف کانگو سے تعلق رکھتا تھا۔ وہ اپنے ملک میں تشدد اور بدامنی سے بھاگ کر بطور پناہ گزین امریکہ آیا تھا۔ وہ اپنے پانچ بھائی بہن اور دو کم سن بیٹیوں کو پیچھے چھوڑ گیا ہے۔ اس کے گھر والوں سے بات چیت کرنے کے بعد مشیگن کے ڈیموکریٹ گورنر گریچن وٹمر نے بتایا کہ پیٹرک لییویا اپنے ملک میں فسادات اور تشدد سے بھاگ کر بطور پناہ گزین امریکہ آیا تھا۔ گورنر کے بقول، ''ابھی تو اُس کی پوری زندگی اُس کے آ گے پڑے تھی۔‘‘

یہ مہلک واقعہ امریکہ میں سیاہ فام باشندوں کے خلاف پولیس تشدد پر ملک گیر سطح پر آئے دن ہونے والے مظاہروں اور نسل پرستانہ تشدد کے خاتمے کے لیے کیے جانے والے عوامی احتجاج کے درمیان سامنے آیا ہے۔ جس طرح مئی 2020 میں مینیا پولس شہر میں جارج فلائیڈ کے پولیس کے ہاتھوں بیہمانہ طریقے سے ہلاکت کے بعد امریکہ بھر میں سیاہ فام باشندوں کے ساتھ یکجہتی و ہمدردی کا اظہار کرنے والے امریکی باشندے سڑکوں پر نکل آئے تھے۔ وہاں سے نسل پرستی اور سیاہ فام باشندوں پر تشدد کے خاتمے کی مہم ''بلیک لائیوز میٹر‘‘ شروع ہوئی اسی طرح ایک بار پھر احتجاج کرنے والے سڑکوں پر نکل آئے ہیں اور ''بلیک لائیوز میٹر‘‘ کے بینرز کے ساتھ پولیس حکام سے مطالبہ کر رہے ہیں کہ پیٹرک لییویا پر فائرنگ کرنے والے پولیس آفیسر کا نام ظاہر کیا جائے۔

یہ بھی پہلی بار نہیں ہوا کہ گرینڈ ریپڈس کی پولیس نسلی تشدد میں ملوث ہوئی۔ یہ شہر بریونا ٹیلر کی جائے پیدائش تھی جسے پولیس نے 2020 میں ایک چھاپے کے دوران ہلاک کر دیا تھا۔ اس کے بعد شہر نے اپنی ایک سڑک کا نام بدل کر بریونا ٹیلر وے رکھ دیا تھا۔