بھارت: بھکاریوں کو سال بھر میں کروڑوں روپے کی آمدن

صارفین کے رجحانات پر تحقیقات کرنے والی بین الاقوامی کمپنی کنٹار اور بھارت کی اشوکا یونیورسٹی کی مشترکہ تحقیقات پر مبنی ایک تازہ ترین رپورٹ میں کہا گیا ہے کہ بھارت میں دیہی اور شہری علاقوں میں درمیانہ آمدنی والے کنبے اپنی نقد خیرات بالعموم مذہبی تنظیموں یا بھکاریوں کو دیتے ہیں۔

رپورٹ کے مطابق سال 2020-21 میں بھارتیوں نے مجموعی طور پر 23700 کروڑ روپے نقدی عطیات دیے۔ اس کا سب سے بڑا حصہ جو تقریبا 16 ہزار کروڑ سے زائد یعنی 64 فیصد مذہبی اداروں کو ملا جبکہ بھیک مانگنے والوں کی جھولی میں 12900 کروڑ روپے گئے۔ مذہبی اداروں کو ملنے والے عطیات میں نقدی کے علاوہ چیک اور دیگر ذرائع بھی شامل ہیں۔

غیرحکومتی تنظیمیں اور ہسپتال عطیات حاصل کرنے کے لحاظ سے تیسرے نمبر پر رہیں۔ انہیں مجموعی طورپر 1.1ہزار کروڑ روپے ملے۔

اس رپورٹ میں کہا گیا ہے کہ لوگ عطیات کے طور پر اشیائے ضرورت کے بجائے نقدی دینا زیادہ پسند کرتے ہیں۔ اس کے علاوہ شہروں کے مقابلے میں دیہی علاقوں کے افراد زیادہ خیرات دیتے ہیں۔ یہ رپورٹ بھارت کی 18ریاستوں میں 81000 کنبوں کے سروے پر مبنی ہے۔

رپورٹ میں یہ بھی کہا گیا ہے کہ عطیات دینے والوں میں بیشتر افراد کی عمریں 46 سے 60 برس کے درمیان تھیں۔ اس کے علاوہ مرد حضرات "قریبی رشتہ داروں اور احباب" کو عطیات دینے میں فیصلہ کن کردار ادا کرتے ہیں جب کہ "گھریلو ملازمین" اور "بھکاریوں" کی مالی اعانت دینے میں خواتین آگے رہتی ہیں۔

تحقیقات میں یہ بات سامنے آئی کہ مذہبی اداروں کو مالی اعانت دینے کے پیچھے سب سے عام محرک خاندانی روایات ہیں۔ لوگ خصوصی تہواروں یا متبرک سمجھے جانے والے مواقع پر مذہبی تنظیموں کو عطیات دینا زیادہ پسند کرتے ہیں۔

تحقیقاتی ٹیم کی ڈائریکٹر سواتی سریشٹھ کا کہنا ہے کہ بھارت میں اپنی نوعیت کی یہ پہلی کوشش ہے۔ اس سے لوگوں میں عطیات دینے کے رجحانات اور وجوہات کو سمجھنے میں مدد ملے گی کیونکہ اس سروے میں ملک کے تقریباً تمام علاقوں اور سماجی گروپوں کا احاطہ کیا گیا ہے۔

انہوں نے بتایا کہ مشرقی اور جنوبی بھارت کے افراد بالترتیب 96 اور 94 فیصد کے ساتھ عطیات اور خیرات دینے میں سب سے آگے ہیں۔ "دوسرے لفظوں میں ان دونوں علاقوں میں ہر دس میں سے نو افراد عطیات دیتے ہیں۔"

رپورٹ سے یہ بات بھی سامنے آئی ہے کہ زائد رقوم مثلاً دس ہزار روپے سے زیادہ، یا پانچ سے دس ہزار روپے یا ایک ہزار سے پانچ ہزار روپے کے درمیان عطیات لوگ اپنے ضرورت مند رشتہ داروں یا احباب یا گھریلو ملازمین کو دینا پسند کرتے ہیں۔

بھارتی شہری سب سے کم رقم کے نقد عطیات یعنی 100روپے سے کم بھکاریوں کو دیتے ہیں جب کہ اس سے کچھ زیادہ یعنی ایک سو سے تین سو یا پانچ سو روپے تک کی رقم مذہبی تنظیموں کو دیتے ہیں۔

سواتی سریشٹھ کا کہنا تھا،"ذاتی طورپر میرا خیال تھا کہ کووڈ انیس کی وبا عطیات یا خیرات دینے کی سب سے بڑی محرک رہی ہوگی لیکن اس مخصوص مدت کے دوران ہماری تحقیقات نے میرے خیال کی تردید کردی۔"