واٹس ایپ نے اپریل میں ہندوستان میں 71 لاکھ سے زیادہ اکاؤنٹس بند کر دئے

نئی دہلی: واٹس ایپ نے ملک کے قوانین کی خلاف ورزی کرنے پر اپریل کے مہینے میں ہندوستان میں 71 لاکھ سے زائد اکاؤنٹس بند کر دئے۔ کمپنی نے ہفتے کے روز کہا، ’’بین کئے گئے 7182000 واٹس ایپ اکاؤنٹس میں سے 1,302,000 کو صارفین کی جانب سے کوئی رپورٹ موصول ہونے سے پہلے ہی فعال طور پر بلاک کر دیا گیا تھا۔‘‘

خیال رہے کہ میسجنگ پلیٹ فارم واٹس ایپ کے ہندوستان میں 55 کروڑ سے زیادہ صارفین ہیں۔ اسے ملک بھر سے 10,554 شکایات موصول ہوئیں اور جن پر کارروائی کی گئی ان کی تعداد صرف چھ تھی۔ نئے انڈین آئی ٹی رولز 2021 کے تحت اپنی ماہانہ تعمیل رپورٹ کے مطابق، واٹس ایپ کو ملک میں شکایت اپیلاٹ کمیٹی سے بھی دو آرڈر موصول ہوئے اور اس نے دونوں کی تعمیل کی۔

کمپنی نے کہا کہ ’’ہم اپنے کام میں شفافیت برقرار رکھیں گے۔ ہم مستقبل کی رپورٹس میں اپنی کوششوں کے بارے میں معلومات شامل کریں گے۔‘‘

واضح رہے کہ مارچ میں واٹس ایپ نے ہندوستان میں 79 لاکھ سے زائد اکاؤنٹس پر پابندی عائد کر دی تھی۔ مارچ میں پلیٹ فارم کو ریکارڈ 12,782 شکایات موصول ہوئیں اور ان میں سے 11 پر کارروائی کی گئی۔

کمپنی ان کوششوں کی نگرانی کے لیے انجینئرز، ڈیٹا سائنسدانوں، تجزیہ کاروں، محققین، اور قانون کے نفاذ، آن لائن سیکورٹی اور ٹیکنالوجی کی ترقی کے ماہرین کی ایک ٹیم کی تقرری کرتی ہے۔

واٹس ایپ کا کہنا تھا، ’’ہم صارفین کے فیڈ بیک پر پوری توجہ دیتے ہیں۔ غلط معلومات کو روکنے، سائبرسیکوریٹی کو فروغ دینے اور انتخابی سالمیت کو برقرار رکھنے کے لیے ماہرین کے ساتھ رابطہ میں رہتے ہیں۔‘‘