کمزور نظر آنے والی تصویر وائرل ہونے پر سنیتا ولیمس کی صحت کے بارے میں وضاحت

خلا میں کئی مہینوں سے پھنسی ہند نژاد امریکی خؒلا باز سنیتا ولیمس کی صحت کو لے کر کافی باتیں ہونے لگی ہیں۔ جب سے ایک تصویر جاری ہوئی ہے جس میں ان کے گال دھنسے ہوئے ہیں اور وہ کافی کمزور دکھائی دے رہی ہیں، تب سے ہی ان کے تئیں لوگوں کی فکر بڑھ گئی ہے۔ اس درمیان خبر ہے کہ خود سنیتا ولیمس نے اپنی صحت کے سلسلے میں اَپڈیٹ دیا ہے۔ انہوں نے کہا ہے کہ ان کی طبیعت ٹھیک ہے۔ ساتھ ہی انہوں نے اپنی ایسی تصویر کی وجہ بھی بتائی ہے۔

ہندوستان ٹائمس کی ایک رپورٹ کے مطابق ولیمس نے اپنی تازہ صحت کی وجہ فلوئڈ شفٹس کو بتایا ہے۔ ساتھ ہی انہوں نے یہ بھی سمجھانے کی کوشش کی ہے کہ ان کی صحت کے بارے میں فکر کرنے کی کوئی ضرورت نہیں ہے۔

منگل کو نیو انگلینڈ اسپورٹس نیٹ ورک کلب ہاؤس کڈس شو سے بات چیت کے دوران انہوں نے کہا "ساتھیوں! خلا میں آپ جانتے ہیں کہ ان کے سر تھوڑے بڑے لگنے لگتے ہیں، کیونکہ فلوئڈس جسم کے ساتھ یکساں طور سے پھیل جاتے ہیں"۔ انہوں نے آگے کہا کہ وہ پہلے کی طرح ہی صحت مند ہیں اور وزن میں بھی کسی طرح کی کوئی کمی نہیں آئی ہے۔ انہوں نے بتایا کہ خلا میں طویل وقت تک رہنے کے بعد ان کا وزن بڑھ گیا ہے اور ساتھ ہی جانگھیں بھی تھوڑی بڑھ گئی ہیں۔

ناسا کے ترجمان جمی رسل کی طرف سے جاری بیان میں کہا گیا تھا کہ "ناسا کے سبھی خلاباز کی مستقل طبی جانچ ہوتی ہے، ان کے پاس فلائٹ سرجن ہوتے ہیں جو ان کی نگرانی کرتے ہیں اور ان سبھی کی صحت بہتر ہے۔" حالانکہ ولیمس کے مشن میں سیدھے طور پر شامل رہے ناسا کے ایک ملازم نے دعویٰ کیا تھا کہ خلاباز مسافر کا وزن کافی کم ہو گیا ہے۔