دہلی امبارکیشن پوائنٹ کے حجاج کی وطن واپسی کا سلسلہ مکمل، حج کمیٹی کی چیئرپرسن کوثر جہاں نے کیا استقبال

نئی دہلی: مقدس سفر حج 2024  کے لیے دہلی کے اندرا گاندھی انٹرنیشنل ایئرپورٹ سے جانے والے حجاج کرام کی اپنے وطن واپسی کا سلسلہ آج مکمل ہو گیا۔ حجاج کرام کی وطن واپسی کا یہ سلسلہ 22 جون سے شروع ہوا تھا جو 9 جولائی کو سعودی ایئرلائنز کی آخری پرواز نمبر ایس وی-3630 کے شام 5 بجے دہلی پہنچنے کے ساتھ اختتام پذیر ہوا۔ دہلی کے اندرا گاندھی انٹرنیشنل ایئرپورٹ پر حجاج کرام کے آخری قافلے کے استقبال کے لیے دہلی اسٹیٹ حج کمیٹی کی چیئرپرسن کوثر جہاں، ایگزیکٹیو آفیسر اشفاق احمد عارفی، ڈپٹی ایگزیکٹیو آفیسر محسن علی اور حج کمیٹی کے دیگر افسران و ملازمین موجود رہے۔ ان سبھی نے آخری قافلے کے حجاج کرام کو وطن واپسی پر مبارکباد پیش کی۔

آخری پرواز سے حجاج کرام کی وطن واپسی کے موقع پر دہلی اسٹیٹ حج کمیٹی کی چیئرپرسن کوثر جہاں نے ایئرپورٹ پر تمام متعلقہ ایجنسیوں، جن میں سعودی ایئرلائنز، ڈایل، سی آئی ایس ایف، امیگریشن، سیلبی وغیرہ کو بھی ان کی خدمات کے لیے شکریہ ادا کیا۔ اس موقع پر دہلی اسٹیٹ حج کمیٹی کے ایگزیکٹیو افسر اشفاق احمد عارفی نے بتایا کہ اس سال پورے ہندوستان سے 139964 لوگ حج کی سعادت حاصل کرنے گئے تھے، جبکہ دہلی امبارکیشن پوائنٹ سے حج پر جانے والے حاجیوں کی تعداد 16443 تھی۔

اشفاق احمد عارفی نے بتایا کہ پورے ہندوستان میں مجموعی طور پر 20 امبارکیشن پوائنٹ سے عازمین حج سعودی شہر مکہ اور مدینہ کے لیے جاتے ہیں۔ حج کی پروازیں دو فیس میں جاتی ہیں۔ پہلے فیس میں دہلی سے 9 مئی سے 25 مئی کے درمیان جانے والے حجاج کرام کی واپسی 22 جون سے 9 جولائی کے درمیان ہوئی ہے، جبکہ دوسرے فیس کے حجاج کرام کی واپسی یکم جولائی سے 21 جولائی کے درمیان ہوگی۔ پہلے فیس میں 46 پروازوں سے مجموعی طور پر 16431 حجاج کرام وطن واپس لوٹے، ان میں 8557 مرد، 7773 خواتین، 39 بچے، 09 شیر خوار بچے اور بغیر محرم کے حج کرنے والی 53 خواتین شامل ہیں۔

انھوں نے یہ بھی بتایا کہ حج 2025 کی تیاری بھی اب جلد ہی شروع ہو جائے گی اور حج کمیٹی آف انڈیا کی ہدایت کے مطابق دہلی اسٹیٹ حج کمیٹی نے اس مقصد سے اپنا کام شروع کر دیا ہے۔