سرسید کی تعلیمات کو ہر وقت سینے سے لگائے رکھیں: پروفیسر ابن کنول

شعبہ اردو دہلی یونی ورسٹی میں سرسید کی ولادت کے دو سو سال مکمل ہونے پر ایک سمینار کا انعقاد کیا گیا جس میں پروفیسر ابن کنول صدر شعبۂ اردو نے اپنے صدارتی خطاب میں سرسید کی خدمات پر روشنی ڈالتے ہوئے کہا کہ آج مسلمانوں میں جو تعلیمی بیداری ہے وہ سرسید ہی کی مرہون منت ہے۔ انہوں نے کہا کہ دنیا میں ہزاروں لاکھوں لوگ پیدا ہوتے ہیں اور چلے جاتے ہیں ان کا کوئی نام لیوا نہیں ہوتا ہے مگر کچھ لوگ ایسے ہوتے ہیں جو اپنے کارناموں کی وجہ سے زند ہ و جاوید ہوجاتے ہیںانہی شخصیات میں ایک سرسید بھی تھے۔ انہوں نے ملک وقوم کی ترقی میں نمایاں کردار ادا کیا ہے۔ سرسید اپنے مشن میں ہندومسلم کی تفریق کے قائل نہ تھے۔ وہ دونوں قوموں کی ترقی چاہتے تھے۔ انہوں نے مزید کہا کہ سرسید کو یاد کرنے کے لیے ان کی ولادت اور وفات کی تاریخوں کی ضرورت نہیں ہے ہمیں ہر وقت ان کے ارشادات وفرمودات کو سینے سے لگائے رکھنا چاہئے۔ آپ نے جواہر لعل نہرو کے حوالے سے کہا کہ اگر سرسید نہ ہوتے تو ہندوستانی مسلمان تعلیم میں پچاس سال پیچھے ہوتے۔

اس موقع پر ڈاکٹر علی جاوید نے اپنی تقریر میں شخصیات کے ذکر میں اعتدال کا رویہ اپنانے پر زور دیتے ہوئے کہا ہمیں ان کو داستان کے ہیرو کی طرح نہیں پیش کرنا چاہئے۔ انہوں نے کہا کہ اردو ادب میں سرسیدایک نثر نگار کے طور پر ہمیشہ زندہ وجاوید رہیں گے۔ داکٹر مشتاق احمد قادری نے کہا کہ سرسید نے خود کو قوم وملت کے لیے وقف کردیا تھا۔ ان کی جلائی ہوئی شمع آج پورے ملک خصوصاً کشمیر کے کونے کونے میں روشن ہے۔ ڈاکٹر محمد کاظم نے سرسید کے خطوط کی اہمیت پر روشنی ڈالتے ہوئے کہا کہ ان میں ادبی چاشنی پائی جاتی ہے۔ ان خطوط کو بھی غالب کے خطوط کے ساتھ پڑھایا جانے چاہئے۔ ڈاکٹر احمد امتیاز نے اپنے مقالہ میں سرسید کی خدمات پر روشنی ڈالی اور ان کے مشن کو آگے بڑھانے پر زور دیا۔ ڈاکٹر شہلا نواب نے اپنے مقالہ میں سرسید کے مختلف نظریات پر روشنی ڈالی ۔ ڈاکٹر شاذیہ عمیر نے عورتوں کی تعلیم کے سلسلے میں سرسید پر کیے گیے اعتراضات کا جواب دیا۔ اس سلسلے میں انہوں سرسید کی مختلف تحریروں کے حوالے سے سرسید کے تعلیمی نظریات کو واضح کیا۔ اس موقع پر شعبۂ اردو کے ریسرچ اسکالر محمد شاداب شمیم نے ’مکاتیب سرسید میں تایخی وتہذیبی عناصر‘؛ امیر حمزہ نے ’تہذیب الاخلاق ملت کا اکسیر‘ اور علی ریحان ترابی نے ’سرسید کے اردو نثر کا تنقیدی مطالعہ‘ کے عنوان سے تحقیقی مقالے پیش کیے۔ پروگرام کا اختتام ترانۂ علی گڑھ پر ہوا جس کو ڈاکٹر دانش حسین خان نے پیش کیا۔ پروگرام میں ڈاکٹر ابو بکر عباد، ڈاکٹر ارشاد نیازی، ڈاکٹر علی احمد ادریسی اور ڈاکٹر سرفراز جاوید کے علاوہ طلبا اور ریسرچ اسکالرس کی بڑی تعداد نے شرکت کی۔