مظفر نگر اسکول سانحہ: مولانا محمود مدنی نے سخت دفعات کے تحت کارروائی کا کیا مطالبہ

نئی دہلی: جمعیۃ علماء ہند کے صدر مولانا محمود اسعد مدنی نے مظفر نگر کے کھباپور گاؤں میں ہوئے ’اسکول سانحہ‘ پر سخت غم و غصہ کا اظہار کیا ہے اور سرکار سے مطالبہ کیا ہے کہ از خود نوٹس لیتے ہوئے قصور وار ٹیچر کو کیفر کردار تک پہنچایا جائے۔ اس سلسلے میں مولانا مدنی نے وزیر اعلیٰ یوگی آدتیہ ناتھ، یونین منسٹر برائے ترقی خواتین و اطفال، نیشنل کمیشن فار چائلڈرائٹس (این سی پی سی آر) نیشنل ہیومن رائٹس کمیشن اور نیشنل کمیشن فار مائناریٹز کو خط لکھ کر فوری کارروائی کا مطالبہ کیا ہے۔

خط میں خاص طور سے کہا گیا ہے کہ ’’میری آپ سے گزارش ہے کہ مذکورہ واقعہ کا از خود نوٹس لیں اور مجرم کے خلاف چائلڈر رائٹس، ہیومن رائٹس، ایجوکیشنل رائٹس اور دو قوموں کے درمیان منافرت کی روک تھام ایکٹ کے تحت مقدمہ درج کریں۔ نیز آپ متعلقہ ضلع انتظامیہ کو جلد ہدایت دیں کہ وہ معمولی دفعات لگا کر اس سنگین معاملہ پر پردہ پوشی کی کوشش نہ کرے۔‘‘

مولانا مدنی نے کہا کہ ملک میں نفرت پھیلانے کا پاٹھ شالہ کسی بھی صورت میں منظور نہیں ہے۔ میرا دل اس بات سے بہت دکھی ہے کہ ہمارا ملک ہیٹ اسپیچ کا مرکز بنتا جارہا ہے۔ اس کی شروعات سیاسی حکمراں اور چند میڈیا ادارے کے ذریعہ نفرت پر مبنی بیانات اور پروگرام سے ہوئی۔ جب اس صورت حال کی روک تھام پر توجہ نہیں دی گئی تو آج ملک کی فضا اس قدر مسموم ہو گئی ہے کہ اب حفاظتی ادارے یہاں تک علم کا مرکز سمجھا جانے والا اسکول بھی اس کا شکار ہو رہا ہے۔

واضح ہو کہ کھباپور منصورپور گاؤں میں نیہا پبلک اسکول کی پرنسپل ترپتا تیاگی کے حوالے سے ایک ویڈیو منظر عام پر آئی ہے جس میں وہ ایک طالب علم کو مسلم ہونے کی وجہ سے جسمانی تشدد اور توہین آمیز ریمارکس کا نشانہ بنا رہی ہے۔ اس طرح کے قابل مذمت اقدامات نہ صرف تعلیم کے اصولوں کی خلاف ورزی ہیں بلکہ تعصب اور نفرت کو بھی دوام بخشتے ہیں جن کی ہمارے معاشرے میں کوئی جگہ نہیں ہے۔ مولانا مدنی نے کہا کہ ہر بچہ ایک محفوظ اور جامع تعلیمی ماحول کا مستحق ہے، جہاں وہ شخصی اور تعلیمی طور پر ترقی کر سکے۔ زیر بحث استاد کا رویہ ان بنیادی اصولوں اور پیشہ ورانہ طرز عمل کی سنگین خلاف ورزی ہے۔ ہم متعلقہ اداروں سے پرزور مطالبہ کرتے ہیں کہ وہ اس تکلیف دہ واقعے سے نمٹنے کے لیے فوری اور پرعزم اقدامات کریں اور واقعہ کی مکمل تفصیلات سے پردہ اٹھانے اور استاد کی حرکتوں کا منصفانہ جائزہ کے لیے ایک مکمل اور صاف شفاف تحقیقات کی جانی چاہیے تاکہ مستقبل میں ایسے واقعات کی روک تھام کو یقینی بنایا جا سکے۔ کسی بھی قسم کے امتیازی سلوک، ایذا رسانی یا تشدد کے لیے صفر رواداری کی پالیسی اپنانی چاہیے اور اس پالیسی سے تمام عملے اور طلبا کو واقف کرانا چاہیے۔ نیز تنوع، شمولیت اور ثقافتی حساسیت کی تربیت بھی ضروری ہے۔

مولانا مدنی نے مقامی جمعیۃ علماء کو ہدایت دی ہے کہ جذباتی اور نفسیاتی اثرات پر قابو پانے کے لیے طالب علم اور اس کے اہل خانہ کا تعاون کریں، نیز مقامی انتظامیہ سے ملاقات کر کے سخت قانونی اقدامات پر آمادہ کیا جائے۔ چنانچہ آج دوپہر جمعیۃ علماء مظفر نگر کے وفد نے ضلع سکریٹری قاری محمد ذاکر کی قیادت میں متاثرہ خاندان سے ان گھر کے پر جا کر ملاقات کی اور جمعیۃ کی طرف سے ہر ممکن انسانی و اخلاقی مدد کی یقین دہانی کرائی۔ جمعیۃ علماء کی ٹیم لگاتار اس معاملے پر نگاہ رکھے ہوئی ہے اور حسب ضرورت قدم اٹھایا جائے گا۔