پاکستان کے سابق وزیر اعظم عمران خان کے ساتھ ساتھ اسعد عمر اور فواد چودھری کے خلاف بھی وارنٹ جاری

پاکستان کے سابق وزیر اعظم عمران خان کے لیے ایک بار پھر بری خبر سامنے آئی ہے۔ پاکستان تحریک انصاف (پی ٹی آئی) کے سربراہ عمران خان کے خلاف ضمانتی وارنٹ جاری کیا گیا ہے۔ ان کے علاوہ اسعد عمر اور فواد چودھری کے خلاف بھی وارنٹ جاری ہوا ہے۔ یہ وارنٹ پاکستان کے الیکشن کمیشن کی چار رکنی بنچ نے جاری کیا ہے۔

میڈیا رپورٹس کے مطابق عمران خان کے خلاف یہ گرفتاری وارنٹ خلاف ورزی کے ایک معاملہ میں جاری ہوا ہے، معاملہ کی سماعت کرتے ہوئے نثار درانی کی قیادت میں چار رکنی بنچ نے اپنا فیصلہ سنایا۔ اب اس معاملے کی سماعت آئندہ 17 جنوری تک کے لیے ملتوی کر دی گئی ہے۔ دراصل الیکشن کمیشن نے گزشتہ سال پی ٹی آئی کے سرکردہ لیڈران کو ہتک عزتی کا نوٹس جاری کیا تھا۔

الیکشن کمیشن کا کہنا ہے کہ عمران خان اور پی ٹی آئی کے بڑے لیڈران نے انتخابی کمیشن اور چیئرمین کے بارے میں اپنی ریلیوں و میڈیا میں بے حد قابل اعتراض باتیں کہی تھیں۔ پی ٹی آئی لیڈران نے کمیشن میں اس کیس میں چھوٹ دینے کی گزارش کی تھی لیکن کمیشن نے ان کی اپیل خارج کر دی۔ کمیشن نے سبھی لیڈروں کو 17 جنوری کو پیش ہونے کا حکم دیا ہے۔ اس سے قبل کمیشن نے 3 فروری کو اپنا فیصلہ محفوظ رکھ لیا تھا۔

اس درمیان الیکشن کمیشن کے فیصلے کے خلاف پی ٹی آئی لیڈر فواد چودھری نے ہائی کورٹ جانے کی بات کہی ہے۔ انھوں نے ٹوئٹ کر کہا ہے کہ ’’ہم فیصلے کے خلاف ہائی کورٹ جائیں گے اور کمیشن کے خلاف ہتک عزتی کا کیس درج کروائیں گے۔ گرفتاری وارنٹ جاری کرنے کا الیکشن کمیشن کا یہ فیصلہ ہائی کورٹ کے فیصلے کی خلاف ورزی ہے۔ اس کیس پر سماعت 17 جنوری کو ہونی تھی لیکن فیصلہ آج ہی آ گیا، جو اصولوں کے خلاف ہے۔‘‘