بلوچستان درگاہ میں فدائین حملہ، کم از کم 13 ہلاک

پاکستان کے بلوچستان واقع صوفی درگاہ میں آج ایک فدائین حملہ آور نے خود کو دھماکہ سے اڑا دیا جس میں کم از کم 13 لوگوں کی موت ہو گئی ہے۔ اس دہشت گردانہ حملہ میں کم از کم 20 لوگوں کے زخمی ہونے کی بھی اطلاع ہے۔ ذرائع کے مطابق جس وقت خود کش حملہ آور نے خود کو دھماکہ سے اڑایا، درگاہ زائرین سے بھری ہوئی تھی۔ ایک پرائیویٹ چینل نے اس سلسلے میں اپنی رپورٹ میں بتایا کہ بلوچستان کے جھال مگسی ضلع واقع درگاہ فتح پور میں یہ واقعہ پیش آیا۔ اطلاعات کے مطابق پہلے فدائین نے درگاہ کے اندر گھسنے کی کوشش کی لیکن پولس کو شبہ ہو گیا اور اسے روکنے کی کوشش کی گئی۔ اس درمیان فدائین نے درگاہ کے قریب جا کر خود کو دھماکہ سے اڑا دیا۔

بلوچستان حکومت کے ترجمان انوارالحق کاکر نے ایک خبر رساں ایجنسی سے بات چیت کے دوران اس فدائین حملہ کی تصدیق کی ہے۔ انھوں نے بتایا کہ دھماکہ ایسے وقت ہوا جب درگاہ میں سینکڑوں لوگ زیارت کرنے کے لیے موجود تھے۔ دھماکہ میں کم از کم ایک پولس جوان کی موت اور دو کے زخمی ہونے کی خبریں موصول ہو رہی ہیں۔ مقامی انتظامیہ نے سبّی اور ڈیرا مراد جمالی کے اسپتال میں ایمرجنسی کا اعلان کر دیا ہے اور زخمیوں کو علاج کے لیے وہاں داخل کرایا گیا ہے۔