شہباز شریف نے پاکستان کے 24 ویں وزیر اعظم کی حیثیت سے حلف اٹھایا

اسلام آباد: پاکستان کے نومنتخب وزیراعظم شہباز شریف نے پاکستان کے 24 ویں وزیراعظم کی حیثیت سے حلف لیا۔ پاکستانی صدر مملکت عارف علوی نے شہباز شریف کو عہدے اور رازداری کا حلف دلایا۔

تقریبِ حلف برداری میں صوبہ سندھ، بلوچستان اور پنجاب کے وزرائے اعلیٰ نے شرکت کی۔ ایوانِ صدر میں ہونے والی اس تقریب میں جوائنٹ چیف آف اسٹاف کمیٹی جنرل ساحر شمشاد اور آرمی چیف جنرل عاصم منیر بھی شریک تھے۔

اس کے علاوہ آصف زرداری، نواز شریف، بلاول بھٹو زرداری، وزیر اعلیٰ پنجاب مریم نواز، وزیر اعلیٰ سندھ مراد علی شاہ اور وزیر اعلیٰ بلوچستان سرفراز بگٹی بھی تقریب میں شریک تھے جب کہ مختلف ممالک کے سفیر بھی تقریب حلف برداری کا حصہ تھے۔

نو منتخب وزیرِ اعظم شہباز شریف کی حلف برداری کے بعد وزیراعظم ہاؤس میں مسلح افواج کی جانب سے انھیں گارڈ آف آنر پیش کیا گیا، جب کہ سبکدوش ہونے والے نگران وزیراعظم انوار الحق کاکڑ کو بھی گارڈ آف آنر پیش کیا گیا۔

یاد رہے کہ گزشتہ روز قومی اسمبلی میں ہونے والی ووٹنگ میں شہباز شریف 201 ووٹ حاصل کرکے وزیر اعظم منتخب ہوئے تھے جب کہ ان کے مدِمقابل امیدوار عمر ایوب خان نے 92 ووٹ حاصل کیے تھے۔