پاکستان: بسنت پر روشنی، موسیقی اور ’بو کاٹا‘ سے پنجاب پھر محروم

پاکستان کے پنجاب میں بسنت پر عائد پابندی کو ختم کرنے کے سرکاری اعلان کے بعد جو خوشی وہاں کے باشندگان بالخصوص نوجوانوں کے چہروں پر نمایاں ہوئی تھی وہ اب کافور ہو چکی ہے کیونکہ اب حکومت پنجاب نے کہا ہے کہ رواں سال میں بھی بسنت تہوار نہیں منایا جا رہا ہے۔ پنجاب حکومت نے لاہور ہائی کورٹ میں بسنت تہوار منانے کے خلاف درخواستوں پر تحریری جواب جمع کراتے ہوئے کہا ہے کہ بسنت منانے کے لیے پہلے باقاعدہ قانون سازی ہوگی۔

ماضی میں بسنت کے موقع پر لاہور کا آسمان رنگ برنگی پتنگوں سے بھر جاتا تھا۔ اس موقع پر خصوصی پکوان تیار کیے جاتے تھے اور تہوار کی مناسبت سے لباس پہنے جاتے تھے۔ پھر جب بعض لوگوں کی جانب سے پتنگوں کی سوتی ڈور کی بجائے غیر قانونی دھاتی تار کے استعمال سے گلا کٹنے کے واقعات میں عام شہریوں کی ہلاکتیں بڑھنے لگیں تو 2007 میں پتنگ اڑانے پر پابندی عائد کر دی گئی۔

بسنت تہوار منائے جانے پر پابندی عائد کرنے کی ایک بڑی وجہ کیمیکل پتنگ ڈور کا استعمال ہونا تھا جس کے باعث ہر سال کئی افراد کے زخمی اور ہلاک ہو جانے کی خبریں منظر عام پر آتی تھیں۔

پاکستانی صوبہ پنجاب کے وزیر اطلاعات و ثقافت فیاض الحسن چوہان نے کہا کہ انہوں نے ایک کمیٹی کی تشکیل کا اعلان کر دیا ہے جو کیمیکل مانجھے یا دیگر منفی سرگرمیوں کو کنٹرول کرنے کے ليے کام کرے گی۔

دراصل بسنت تہوار منانے کا اعلان ہونے کے ساتھ ہی صوبہ بھر میں پتنگ بازی شروع ہو گئی تھی۔ جس کی وجہ سے اب تک متعدد بچے اور بچیاں گلے پر ڈور لگنے اور کرنٹ لگنے سے ہلاک ہو چکے ہیں۔ واضح رہے کہ پاکستان میں پتنگ بازی کے خلاف ایک ایکٹ بن گیا ہے لیکن اصول نہیں بنے ہیں۔

دریں اثنا پنجاب حکومت کے وکیل ایڈووکیٹ شعیب ظفر نے عدالت میں حکومت پنجاب کا تحریری جواب جمع کرایا ہے۔ جس کے مطابق پنجاب حکومت کا رواں سال صوبے میں بسنت تہوار منانے کا کوئی ارادہ نہیں ہے اور نہ ہی وہ کسی کو اجازت دے رہی ہے۔ پنجاب حکومت کے وکیل نے عدالت کو بتایا کہ صوبہ پنجاب میں بسنت منانے کے لیے پہلے باقاعدہ قانون سازی کی جائے گی۔

عدالت نے بسنت سے متعلق تمام درخواستیں نمٹاتے ہوئے کہا کہ اگر مستقبل میں بسنت تہوار منانا ہوا تو حکومت تمام احتیاطی تدابیر اختیار کرے گی۔

سنیئر وزیر پنجاب عبدالعلیم خان کی جانب سے جاری کردہ اعلامیہ کے مطابق پتنگ بازی کے لیے ڈور اور پتنگ کی تیاری کا نظام رجسٹرڈ ہونا چاہیے۔ عبدالعلیم خان نے کہا کہ محفوظ بسنت کے انعقاد کے لیے چار سے چھ ماہ کا وقت درکار ہے۔

واضح رہے گزشتہ سال دسمبر میں پاکستان تحریک انصاف کی حکومت نے بسنت منانے کا اعلان کیا تھا۔ ترجمان وزیراعلٰی پنجاب ڈاکٹر شہباز گل نے اپنے ویڈیو پیغام میں کہا تھا کہ ان کی حکومت فروری 2019 میں بسنت کا تہوار منانا چاہتی ہے کیونکہ اِس سے ثقافتی تہوار کو فروغ حاصل ہوگا۔