پاکستان: پی ٹی آئی کارکنان نے اپنے ’غدار‘ رہنماؤں کا ہوٹل میں کیا محاصرہ

اسلام آباد: پاکستان تحریک انصاف (پی ٹی آئی) کے کارکنان نے بدھ کے روز ہونے والے پنجاب کے وزیراعلیٰ کے اہم انتخاب سے قبل یہاں گل برگ واقع اس ہوٹل کا محاصرہ کر لیا ہے جس میں پی ٹی آئی کے کئی غیر مطمئن اراکین اسمبلی پاکستان مسلم لیگ-نواز (پی ایم ایل-این) کے سیکڑوں اراکین پارلیمنٹ کے ساتھ ٹھہرے ہوئے ہیں۔

پاکستانی اخبار ’ڈان‘ کی منگل کی ایک رپورٹ کے مطابق اس دوران پی ٹی آئی کے کارکنان نے اپنی پارٹی کے غیرمطئن افراد کے خلاف نعرے لگائے اور انھیں ’غدار‘ قرار دیا ۔ انہوں نے پی ایم ایل -این کے 20 اراکین پارلیمنٹ کو ’رہا‘ کرنے کا مطالبہ کیا۔ اس سے قبل پی ٹی آئی پنجاب کے سیکرٹری اطلاعات مسرت جمشید چیمہ نے پارٹی کارکنان اور عہدیداران کو ’غدارِ وطن‘کا محاصرہ کرنے کے لیے ہوٹل پہنچنے کی اپیل کی تھی۔

پی ٹی آئی کے کارکنان نے ہوٹل کے باہر لگے بیریکیڈ ہٹاکر جبراً ہوٹل میں داخل ہونے کی کوشش کی۔ اس کے بعد پی ایم ایل -این کے کچھ اراکین اسمبلی اپنے ہوٹل کے کمروں سے باہر نکل آئے اور عمران خان کے خلاف نعرے بازی شروع کر دی جس کے نتیجے میں ہنگامہ آرائی ہوئی۔

پی ایم ایل -این کے بعض رہنماؤں نے اپنے پارٹی کارکنان کو ہوٹل بلانے کی دھمکی بھی دی۔ تقریباً ڈیڑھ گھنٹے کے بعد حالات بالآخر پرسکون ہوئے اور اس دوران گلبرگ کے مین بُلےوارڈ پر کئی گھنٹے تک ٹریفک ٹھپ رہی۔ بعد ازاں ارکان اسمبلی کی سکیورٹی کے لیے ہوٹل کے باہر پولیس کی اضافی نفری تعینات کردی گئی۔

پنجاب اسمبلی میں اپوزیشن لیڈر حمزہ شہباز نے دعویٰ کیا کہ جب پی ٹی آئی کارکنان نے ہوٹل میں داخل ہونے کی کوشش کی تو 200 کے قریب ارکان اسمبلی ہوٹل میں موجود تھے۔ ڈان کی ایک رپورٹ کے مطابق، بدھ کو وزیراعلیٰ کے انتخاب سے قبل پنجاب اسمبلی کے ڈپٹی سپیکر کی جانب سے 40 سے زائد اپوزیشن اور پی ٹی آئی کے ناراض اراکین اسمبلی کو معطل کرنے کا امکان ہے۔