پاکستان: خیبر پختونخوا میں مسافر گاڑی پر اندھا دھند فائرنگ، 11 مسافر جاں بحق، کئی دیگر دیگر زخمی

پاکستان کے شمال مغربی علاقہ خیبر پختونخوا میں ایک بار پھر اندھا دھند فائرنگ کا واقعہ پیش آیا ہے۔ ہفتہ کے روز نامعلوم بندوق برداروں نے ایک مسافر گاڑی پر فائرنگ کر دی جس میں کم از کم 11 افراد کی موت ہو گئی ہے۔ اس واقعہ میں کم از کم 8 دیگر مسافروں کے زخمی ہونے کی اطلاع بھی موصول ہو رہی ہے۔

کرّم کے ڈپٹی کمشنر جاویداللہ مہسود نے واقعہ کے تعلق سے جانکاری دیتے ہوئے بتایا کہ بندوق برداروں نے افغانستان کی سرحد سے ملحق کرّم ضلع واقع کنج علی زئی علاقہ میں مسافر گاڑی پر منصوبہ بندی کے ساتھ حملہ کیا۔ حملہ آوروں نے گاڑی پر اندھا دھند گولیاں چلائیں جس میں 11 مسافر ہلاک ہو گئے۔ انھوں نے مزید بتایا کہ لاء انفورسمنٹ اہلکار جائے وقوع پر پہنچ گئے ہیں اور پورے علاقے کی گھیرابندی کر لی گئی ہے۔ ساتھ ہی فرار ملزمین کو گرفتار کرنے کے لیے تلاشی مہم شروع کی گئی ہے۔

جاویداللہ مہسود کے مطابق اس واقعہ کے لیے ابھی تک کسی بھی گروپ نے ذمہ داری نہیں لی ہے۔ انھوں نے یہ بھی بتایا کہ پاک-افغان سرحد کے پاس کنج علی زئی پہاڑوں اور وہاں کی سڑکوں پر یہ گولی باری ہوئی۔ اس درمیان ضلع ہیڈکوارٹر اسپتال کے میڈیکل سپرنٹنڈنٹ میر حسن کا کہنا ہے کہ اسپتال میں 9 زخمیوں کو علاج کے لیے داخل کرایا گیا تھا، جن میں سے ایک کی موت ہو گئی اور بقیہ 8 کا علاج جاری ہے۔