پاکستان انتخاب: پیپلز پارٹی نے فتحیابی کی صورت میں 17 وفاقی وزارتوں کو ختم کرنے کا کیا اعلان!

پاکستان میں آئندہ سال فروری میں ہونے والے عام انتخاب کو لے کر سبھی پارٹیاں سرگرم دکھائی دے رہی ہیں۔ سبھی عوام کو لبھانے والے وعدے کر رہی ہیں اور ملک کی معاشی حالت کو بہتر بنانے کا دعویٰ بھی کرتی ہوئی دکھائی دے رہی ہیں۔ اس درمیان پیپلز پارٹی کے چیئرمین بلاول بھٹو نے بھی کچھ اہم اعلانات کیے ہیں۔ انھوں نے وعدہ کیا ہے کہ اقتدار میں آنے کے بعد وفاق میں 17 بڑی وزارتیں بند کر کے 300 ارب روپے عوام پر لگائے جائیں گے۔

پاکستانی میڈیا رپورٹس کے مطابق نواب شاہ کے بختاور گرلز کیڈٹ کالج کی پاسنگ آؤٹ پریڈ سے خطاب کرتے ہوئے بلاول بھٹو زرداری نے کہا کہ فرٹیلائزر، توانائی اور دیگر سیکٹرز کو دی جانے والی 1500 ارب روپے کی سبسیڈی مزدوروں اور کسانوں کو براہ راست دینے کا راستہ ہموار کیا جائے گا۔ ساتھ ہی بلاول نے یہ بھی کہا کہ اقتدار میں آ کر کسان، مزدور اور نوجوان کارڈ اور غریبوں کو 300 یونٹ تک بجلی مفت دی جائے گی۔

بلاول بھٹو کا کہنا ہے کہ پاکستان میں برسراقتدار ہونے پر سولر اور ونڈ پاور منصوبے لگا کر اپنی بجلی خود پیدا کریں گے تاکہ ملک کے حالات بہتر ہو سکیں۔ اس طرح کے منصوبوں سے واپڈا اور کے الیکٹرک کی ضرورت نہیں پڑے گی۔ ساتھ ہی چیئرمین پیپلز پارٹی کا کہنا ہے کہ آئندہ آنے والی حکومت کو وعدہ کرنا ہوگا کہ 5 سال کے اندر تنخواہیں دوگنی کرے گی۔ انھوں نے یہ بھی کہا کہ ’’پرانے سیاستداں پاکستان کا ماضی ہیں، آپ مستقبل ہیں، ہم مل کر محنت کریں گے اور ملک کی ترقی میں حصہ لیں گے۔‘‘