پاکستان: عمران خان کی رِہائی کا فیصلہ سنانے والے چیف جسٹس عمر عطا بندیال کو ہٹانے کی کوششیں شروع

پاکستان میں عمران خان کی رِہائی کے بعد بھی سیاسی ہلچل تھمنے کا نام نہیں لے رہی ہے۔ ایک طرف عمران خان نے دوبارہ گرفتاری کا خدشہ ظاہر کیا ہوا ہے، اور دوسری طرف حکمراں طبقہ کوشش میں ہے کہ عمران کی رِہائی کا فیصلہ سنانے والے چیف جسٹس عمر عطا بندیال کو ہی ہٹا دیا جائے۔ پاکستانی میڈیا رپورٹس کے مطابق اس ضمن میں کوششیں تیز ہو گئی ہیں اور پارلیمنٹ نے چیف جسٹس پاکستان کے خلاف ریفرنس لانے کو منظوری دے دی ہے۔

ذرائع کے مطابق چیف جسٹس عمر عطا بندیال کے خلاف ریفرنس کو حتمی شکل دینے کے لیے خصوصی پارلیمانی کمیٹی تشکیل دی جائے گی جس میں مختلف جماعتوں کے ارکان شامل ہوں گے۔ یہ بھی بتایا جا رہا ہے کہ کمیٹی کی تشکیل کا اختیار قومی اسمبلی کے اسپیکر کو دیا جائے گا۔

اس سے قبل ذرائع کے حوالہ سے بتایا جا رہا تھا کہ مختلف جماعتوں کے ارکان کمیٹی کے اختیارات سے متعلق مسودہ تیار کر رہے ہیں اور پارلیمانی کمیٹی کی تشکیل کی تحریک آج ہی قومی اسمبلی میں پیش کیے جانے کا امکان ہے۔ اب تازہ ترین خبروں کے مطابق پارلیمنٹ نے عمر عطا بندیال کو ہٹانے کے لیے کمیٹی تشکیل دینے پر مہر لگا دی ہے۔