ممبئی حملوں کے ماسٹر مائنڈ حافظ سعید کو پاکستانی عدالت سے 10 سال قید کی سزا

لاہور: ممبئی میں 26/11 حملوں کے ماسٹر مائنڈ حافظ سعید کو پاکستان کی ایک عدالت سے دہشت گردی سے متعلق دو معاملوں میں 10 سال قید کی سزا سنائی گئی ہے۔ پاکستانی میڈیا کے مطابق، لاہور کی انسداد دہشت گردی کی عدالت نے کالعدم جماعت الدعوۃ کے سربراہ حافظ محمد سعید کو غیر قانونی فنڈنگ کے کیس میں مجموعی طور پر ساڑھے 10 سال قید کی سزا سنائی ہے۔

میڈیا رپورٹ کے مطابق جماعت الدعوۃ کے دوسرے رہنماؤں پروفیسر ظفر اقبال اور یحییٰ مجاہد کو بھی ساڑھے 10 سال قید کی سزا دی گئی ہے جبکہ حافظ عبد الرحمان مکی کو 6 ماہ قید کی سزا سنائی گئی گئی ہے۔ یہ پہلی بار نہیں ہے جب جماعت الدعوۃ کے سربراہ کو دہشت گردی کے معاملہ میں سزا سنائی گئی ہے۔ اس سے پہلے فروری میں حافظ سعید اور اس کے کچھ معاونین کو غیر قانونی فنڈنگ کے ہی معاملہ میں 11 سال قید کی سزا سنائی گئی تھی۔

انسداد دہشت گردی کی عدالت نے ملزمان کی جائیداد ضبط کرنے کے احکامات بھی جاری کیے۔ غیر قانونی فنڈنگ کا الزام ثابت ہونے پر کالعدم جماعت الدعوۃ کے رہنماؤں کو دو مقدمات میں سزا سنائی گئی۔ ملزمان کے خلاف مقدمات انسداد دشت گردی ونگ (سی ٹی ڈی) نے درج کیے تھے۔

حافظ سعید نے 2008 میں ممبئی میں حملے کا منصوبہ بنایا تھا، اس وقت 10 دہشت گردوں نے 166 لوگوں کو قتل کر دیا تھا اور سینکڑوں افراد کو زخمی کیا تھا۔ حافظ سعید کو اقوام متحدہ اور امریکہ کی طرف سے عالمی دہشت گرد قرار دیا جا چکا ہے اور اس کے سر پر 10 ملین ڈالر کا انعام رکھا گیا ہے۔ حافظ سعید کو گزشتہ سال جولائی کے مہینے میں بین الاقوامی دباؤ کے سبب دہشت گردی کے لئے فنڈنگ کے معاملہ میں پاکستان میں گرفتار کیا گیا تھا۔ ہندوستان کا کہنا ہے کہ پاکستان اپنی شبیہ کو بے داغ بنانے کے لئے ایسا کر رہا ہے۔