سابق پاکستانی صدر آصف علی زرداری گرفتار

اسلام آباد: نیشنل اکاؤنٹی بیلیٹی بیورو (نیب) نے اسلام آباد ہائی کورٹ کی اجازت کے بعد فرضی کھاتہ معاملہ میں پیر کے دن سابق صدر اور پاکستان پیپلز پارٹی کے شریک چیئرمین آصف علی زرداری کو گرفتار کرلیا۔ عدالت کی اجازت کے بعد نیب کے افسران اسلام آباد میں واقع زرداری کی رہائش گاہ پہنچے اور انہیں حراست میں لے لیا۔

اسلام آباد ہائی کورٹ نے آج ہی زرداری اور ان کی بہن فریال تالپور کو اس وقت زبردست جھٹکا دیا اور دونوں کی ضمانت قبل از گرفتاری کی عرضی خارج کرتے ہوئے انفورسمنٹ ڈائریکٹوریٹ ایجنسیوں کو دونوں کو گرفتار کرنے کی اجازت دے دی۔ جسٹس عامر فاروق اور جسٹس محمد اختر کیانی کی بنچ نے فرضی کھاتہ معاملے میں دونوں کی مستقل ضمات کی عرضی کی سماعت کی تھی۔

یہ معاملہ مبینہ فرضی کھاتوں کے ذریعہ سے دونوں لیڈروں کی نجی کمپنیوں کے ساتھ لاکھوں کے لین دین سے جڑا ہے۔ زرداری کو گرفتار کرنے سے پہلے نیب کے افسران نے قومی اسمبلی کے اسپیکر کو اس کی اطلاع دی تھی۔ نیب کے ترجمان بلال پنو کے مطابق آصف زرداری کی گرفتاری کے متعلق قومی اسمبلی کے اسپیکر کو مطلع کر دیا گیا ہے اور ڈاکٹروں کی ایک ٹیم کو بھی طبی معائنے کے لیے بلایا گیا ہے۔ ملزم کو جسمانی ریمانڈ کے لیے کل احتساب عدالت کے سامنے پیش کیا جائے گا۔ سابق صدر زرداری 28 مارچ سے لے کر اب تک عبوری ضمانت پر تھے جس میں 5 مرتبہ توسیع کی جا چکی تھی۔

واضح رہے کہ پاکستان کے وفاقی تحقیقاتی ادارے ایف آئی اے نے ایک اکاؤنٹ سے مشکوک منتقلی کا مقدمہ درج کیا جس کے بعد کئی جعلی اکاؤنٹس سامنے آئے جن سے مشکوک منتقلیاں کی گئیں۔ ایف آئی اے کا دعویٰ ہے کہ ان مشکوک منتقلیوں سے مستفید ہونے والوں میں متحدہ عرب امارات کے نصیر عبداللہ لوطہ گروپ کے سربراہ عبداللہ لوطہ، آصف علی زرداری اور ان کی بہن فریال تالپور، اومنی گروپ کے سربراہ انور مجید، ان کے بیٹے، بحریہ ٹاؤن کے مالک ملک ریاض کے داماد ملک زین شامل ہیں۔

(یو این آئی ان پٹ کے ساتھ)