پاکستان میں بم دھماکے میں سات افراد ہلاک، 23 زخمی

سینئر پولس افسر عبد الرزاق چیمہ نے نامہ نگاروں کو بتایا کہ پولس کی ایک گاڑی کو نشانہ بنا کر ریڈ زون میں دھماکہ کیا گیا۔ دھماکہ ہائی سیکورٹی والے علاقے میں ہوا جہاں سے قریب ہی اسمبلی کی عمارت اور دیگر سرکاری دفاتر ہیں۔ خیال کیا جا رہا ہے کہ ایک خود کش حملہ آور پولس گاڑی کے پاس گیا اور خود کو اڑا لیا۔ اس حملے میں سات افراد کی موقع پر ہی موت ہو گئی۔

سول اسپتال کے ڈاکٹر وسیم بیگ نے بتایا کہ پانچ پولس اہلکار اور دو شہریوں کی لاشیں اسپتال لائی گئی ہیں۔ دھماکے میں زخمی 23 لوگوں كو بھی اسپتال میں داخل کرایا گیا ہے جن میں کچھ لوگوں کی حالت نازک ہے۔

بم ڈسپوزل اسکواڈ حکام کے مطابق خودکش حملہ آور پیدل تھا، جس کی عمر 15 سے 20 سال کے درمیان تھی۔ حکام نے بتایا کہ دھماکے میں 8 سے 10 کلو بارودی مواد استعمال کیا گیا جبکہ خودکش حملہ آور کے اعضا اور دیگر شواہد کا تجزیہ کیا جارہا ہے۔