آئرلینڈ میں اسکولی بچوں پر چاقو سے حملہ کے بعد تشدد برپا، مشتبہ شخص گرفتار

آئرلینڈ کی راجدھانی ڈبلن میں جمعرات کو ایک اسکول کے باہر بچوں پر چاقو سے حملہ کر دیا گیا۔ اس کے بعد ڈبلن میں تشدد برپا ہو گیا ہے۔ کچھ میڈیا رپورٹس میں بتایا جا رہا ہے کہ فساد جیسے حالات پیدا ہو گئے ہیں اور پولیس معاملے کو قابو کرنے کی کوشش کر رہی ہے۔ موصولہ خبروں کے مطابق چاقو سے کیے گئے حملے میں کم از کم چھ افراد زخمی ہوئے تھے جنھیں فوری طور پر علاج مہیا کرایا گیا۔ اب تک پولیس نے یہ نہیں بتایا ہے کہ حملے کی وجہ کیا تھی۔ حالانکہ کچھ لوگوں کا کہنا ہے کہ یہ دہشت گردانہ حملہ تھا۔

جمعرات کو ہوئے اس حملے میں 30 سال کی ایک خاتون اور 5 سال کا ایک بچہ سنگین طور پر زخمی ہوئے ہیں۔ اس کے علاوہ بھی کم از کم 4 بچے زخمی ہوئے اور انھیں شدید چوٹ آئی ہے۔ پولیس کا کہنا ہے کہ ایک مشتبہ شخص کو گرفتار کیا گیا ہے اور اس سے پوچھ تاچھ کے بعد ہی حملے کی وجہ کا پتہ چلے گا۔

اس واقعہ کے بعد ڈبلن کی سڑکوں پر نکل لوگوں نے پرتشدد مظاہرہ شروع کر دیا ہے۔ پولیس کے مطابق دایاں محاذ لوگوں کا ایک گروپ تشدد کر رہا ہے اور پولیس سے بھی ہاتھا پائی پر آمادہ ہے۔ یہاں تک کہ ڈبلن میں ایک پبلک ٹرانسپورٹ کو بند کر دیا گیا ہے اور کسی بھی مریض کو میٹرنٹی اسپتال جانے سے روکا گیا ہے۔ غور کرنے والی بات یہ ہے کہ جو لوگ سڑک پر نکل کر مظاہرہ کر رہے ہیں وہ امیگریشن کی مخالفت کرتے ہیں۔ ڈبلن میں مظاہرین نے ایک ڈبل ڈیکر بس کو نذرِ آتش بھی کر دیا۔ علاوہ ازیں کئی عمارتوں میں توڑ پھوڑ بھی کی گئی۔

ڈبلن میں اس طرح کے پرتشدد مظاہرہ کو لے کر حکومت حیران و پریشان ہے۔ بتایا جا رہا ہے کہ پہلے 40 سے 50 لوگوں نے سڑک پر نکل کر مظاہرہ شروع کیا، لیکن بعد میں لوگوں کی تعداد بڑھتی گئی اور یہ مظاہرہ پورے شہر میں پھیل گیا۔ اب ڈبلن کے آس پاس کے علاقوں میں بھی پرتشدد مظاہرے ہونے کی خبریں سامنے آ رہی ہیں۔