'چین کی جارحیت کی وجہ سے ہندوستانی حکومت امریکہ کے قریب ہوئی ہے': سابق امریکی این ایس اے

امریکہ کے سابق قومی سلامتی کے مشیر لیفٹیننٹ جنرل (ر) ایچ آر میک ماسٹر نے اپنی نئی کتاب میں دعویٰ کیا ہے کہ وزیر اعظم نریندر مودی کی قیادت میں ہندوستانی حکومت چین کی جارحیت کی وجہ سے امریکہ کے ساتھ ’بے مثال‘ تعاون کی خواہشمند ہے لیکن وہ  پھنس جانے سے بھی ’خوفزدہ‘ ہے۔ "

نیوز پورٹل ’اے بی پی ‘ پر شائع رپورٹ کے مطابق میک ماسٹر نے اپنی کتاب 'ایٹ وار ود آورسیلف' میں کئی انکشافات کیے ہیں، جس میں سابق امریکی صدر ڈونلڈ ٹرمپ کی انتظامیہ کے دوران قومی سلامتی کے مشیر (این ایس اے) کے طور پر اپنے دور کی تفصیلات بیان کی ہیں۔ اپنی کتاب میں میک ماسٹر نے 14 اپریل 2017 سے 17 اپریل 2017 کے درمیان افغانستان، پاکستان اور ہندوستان کے اپنے دورے کا تفصیلی ذکر کیا ہے۔ ہندوستان کے دورے کے دوران، انہوں نے نئی دہلی میں وزیر اعظم نریندر مودی، اس وقت کے خارجہ سکریٹری ایس جے شنکر اور ڈووال سے ملاقات کی۔ تب جے شنکر خارجہ سکریٹری تھے اور آنجہانی سشما سوراج وزیر خارجہ تھیں۔

انہوں نے لکھا، "ہم نے افغانستان میں جنگ اور جوہری ہتھیاروں سے لیس پاکستان سے ہندوستان کو لاحق خطرے کے بارے میں بات کی، لیکن جے شنکر اور ڈووال نے بنیادی طور پر چین کی بڑھتی ہوئی جارحیت کے بارے میں بات کی۔ شی جن پنگ کی جارحیت کی وجہ سے ان کا بے مثال تعاون کا وژن واضح تھا۔ دنیا کی سب سے بڑی اور دنیا کی قدیم ترین جمہوریتوں کے درمیان گہرا شراکت داری منطقی معلوم ہوتی ہے، لیکن ہندوستان کو دشمنی میں پھنسنے کا خدشہ تھا اور وہ اس سے دور رہنے کو ترجیح دیتا ہے اور اسے امریکہ کی کم توجہ کی مدت اور جنوبی ایشیا کے بارے میں ابہام  کا سامنا کرنا پڑتا ہے۔

انہوں نے کہا کہ سرد جنگ کے دوران ناوابستہ تحریک میں ہندوستان کی قیادت کی میراث اور یہ خدشات ہتھیاروں اور تیل کے ایک اہم ذریعہ روس کے تئیں ہندوستان کے متعصبانہ رویے کی وجہ ہیں۔ اپنے دورے کے آخری دن انہوں نے مودی سے ان کی رہائش گاہ پر ملاقات کی۔

سابق این ایس اے نے لکھا، ’’مودی نے گرمجوشی سے ہمارا استقبال کیا۔ یہ واضح تھا کہ ہمارے تعلقات کو گہرا اور وسعت دینا ان کی اولین ترجیح ہے۔ انہوں نے ہندوستان کی قیمت پر اپنا اثر و رسوخ بڑھانے کے لیے چین کی بڑھتی ہوئی جارحانہ کوششوں اور خطے میں اس کی بڑھتی ہوئی فوجی موجودگی پر تشویش کا اظہار کیا۔‘‘ میک ماسٹر نے کہا کہ مودی نے مشورہ دیا کہ امریکہ، ہندوستان، جاپان اور ہم خیال شراکت داروں کو چین کے 'ون بیلٹ ون روڈ' اقدام کے برعکس ایک آزاد اور کھلے ہند-بحرالکاہل کے تصور پر زور دینا چاہیے تاکہ ہر کوئی فائدہ اٹھا سکے۔