پاکستان کوجھٹکا،یواے ای نے پاکستان سےآنےوالی تمام پروازیں رد کیں

جس تیزی کے ساتھ کورونا معاملات میں اضافہ ہو رہا ہے اس کو دیکھتے ہوئے کوئی بھی ملک خطرہ مول لینے کے لئے تیار نہیں ہے اورپوری طرح محتاط ہے ۔ پاکستان میں کوروناکے تعلق سے عمران خان حکومت نے جو غیر سنجیدہ رویہ اختیار کیاہوا ہے اس کی وجہ سے متحدہ عرب اما رات نے پاکستان سے آنے والی تمام پروازوں کورد کرنے کافیصلہ کیا ہے۔

یواے ای نے پابندی کے اس اعلان کے ساتھ یہ بھی کہا ہے کہ پاکستان سے پروازیں اس وقت تک شروع نہیں کی جائیں گی جب تک پاکستان متحدہ عرب امارات کے روٹ میں آنے والے تمام مسافروں کے لئے کووڈ کی جانچ کا انتظام نہیں کرلیتا۔یواے ای نے کہا ہے کہ یہ ضروری قدم ہے تاکہ لوگوں کی صحت سے کوئی کھلواڑ نہ کر سکے۔

یو اے ای نے کہاکہ تمام متاثر مسافر اپنی اپنی ائیر لائنس سے رابطہ کریں اور سفر کی تاریخ آگے بڑھوا لیں۔یواے ای نے کہا ہے کہ وبا کے پھیلنے کی رفتارکو دیکھتے ہوئے کوئی خطرہ مول نہیں لیا جاسکتا اورپوری احتیاط برتی جائےگی۔ واضح رہے پاکستان مستقل ٹیسٹ کٹ اور پی پی ای کی کمی سے جوجھ رہا ہے۔

پاکستان میں کورونا متاثرین کی تعداددولاکھ سے تجاوز کر گئی ہے اوراس وبا سے مرنے والوں کی تعداد چار ہزار سے زیادہ ہو گئی ہے۔