روس اور یوکرین کے درمیان جنگ بندی کیلئے مذاکرات آج پھر، روسی حملے بدستور جاری

ایک مرتبہ پھر روس اور یوکرین کےوفود کے مابین جنگ بندی کے تعلق سے آج بات ہونی ہے۔ واضح رہے کہ روس اور یوکرین کے درمیان جنگ بندی کے لیے مذاکرات آج بیلاروس کی سرحد پر ہوں گے۔

خبر ہے کہ یوکرین اور روس نے تصدیق کی ہے کہ یوکرین کا وفد آج کےمذاکرات کے لیے کیف سے روانہ ہوگیا ہے ۔دوسری جانب روس نے دعوی کیا ہے کہ اس نے یوکرین کے جنوبی شہر خرسون پر کنٹرول کر لیا ہے جس کی یوکرینی فورسز نے تردید کردی۔

واضح رہے دونوں ممالک میں پہلے دور کی بات چیت کوئی خاص پیش رفت نہیں ہوئی تھی لیکن دونوں نے اس بات پر اتفاق کیا تھا کہ دوسرے دور کی بات جلد ہوگی۔ پہلے دور کی بات چیت میں روس نے جہاں اپنی شرائط رکھی تھیں وہیں یوکرین نے کہا تھا کہ روس پہلے پورے یوکرین سے واپس چلا جائے۔

علاوہ ازیں دوسرے اہم ترین شہر خارکیف میں روسی پیرا ٹروپرز کے اترنے کے بعد اسکی یوکرینی فورسز سے شدید جھڑپیں ہوئیں۔ دارالحکومت کیف سمیت کئی شہروں پر روسی حملوں کے باعث جانی نقصان میں اضافے کا خدشہ بھی ظاہر کیا گیا ہے۔

یوکرینی صدر اب تک 6 ہزار روسی فوجیوں کے مارے جانے کا دعویٰ کرچکے ہیں جبکہ روس نے یوکرین میں چار سو اٹھانوے روسی فوجیوں کی ہلاکت کا اعتراف کیا ہے۔