روس-یوکرین جنگ: کیف پر ڈرون حملہ، کئی لوگ سنگین طور پر زخمی، ہر طرف تباہی کا منظر

روس اور یوکرین کے درمیان جاری جنگ نے ایک بار پھر شدت اختیار کر لی ہے۔ جمعہ کی صبح کئی روسی ڈرون نے یوکرین کی راجدھانی کیف کو نشانہ بناتے ہوئے حملے کیے جس میں کئی لوگ زخمی ہوئے ہیں۔ زخمیوں میں کچھ کی حالت سنگین بتائی جا رہی ہے۔ افسران کا کہنا ہے کہ دو درجن سے زیادہ روسی ڈرونوں نے جمعہ کی علی الصبح یوکرین کی راجدھانی کو نشانہ بنایا ہے جس میں دو افراد زخمی ہوئے ہیں۔

یوکرین کی فضائیہ کا کہنا ہے کہ اس ماہ کیف پر یہ چھٹا حملہ تھا اور وسطی، جنوبی اور مغربی یوکرین کے کچھ حصوں کو نشانہ بنا کر کیے گئے ایک بڑے ڈرون جھُنڈ کا حصہ تھا۔ اس میں کہا گیا ہے کہ یوکرینی فضائی ڈیفنس فورس نے 28 حملہ آور ڈرونوں مین سے 24 کو مار گرایا۔

کیف کے میئر وٹالی کلٹسکو نے سوشل میڈیا پلیٹ فارم ٹیلی گرام پر کہا کہ ایک ڈرون نے شہر کے جنوب میں سولومینسکی ضلع میں فلیٹس کے ایک بلاک پر حملہ کیا تھا، جس سے اوپری منزلوں پر آگ لگ گئی۔ حالانکہ فوراً اس پر قابو پا لیا گیا۔ ایمرجنسی سروس کے افسران کا کہنا ہے کہ عمارت کی 24ویں، 25ویں اور 26ویں منزل پر کئی اپارٹمنٹ منہدم ہو گئے۔ دو لوگ زخمی ہوئے جن میں سے ایک کو علاج کے لیے اسپتال میں داخل کرایا گیا ہے۔

کلٹسکو نے یہ بھی جانکاری دی کہ ڈرون کے ٹکڑوں نے نپرو ندی کے مشرقی ساحل پر ڈارنتسکی ضلع میں ایک زیر تعمیر گھر میں آگ لگا دی تھی۔ پوسٹ کی گئی تصویروں میں ٹوٹی ہوئی کھڑکیاں اور اپارٹمنٹ دکھائی دے رہے ہیں۔ فی الحال اس میں کسی کے ہلاک ہونے کی جانکاری نہین ملی ہے، لیکن کئی مقامات پر آگ لگ گئی ہے۔