روس: ہیلی کاپٹر حادثہ میں ہلاک سبھی 22 افراد کی لاشیں برآمد، حادثہ کی تحقیقات جاری

روس میں ہفتہ کے روز ایک ہیلی کاپٹر حادثہ ہوا تھا جس میں 22 افراد سوار تھے، سبھی کی لاشیں برآمد کیے جانے کی خبریں سامنے آ رہی ہیں۔ میڈیا رپورٹس کے مطابق ایمرجنسی وزارت کے افسران نے پیر کے روز جانکاری دیتے ہوئے بتایا کہ ہیلی کاپٹر میں خاص طور سے سیاح سوار تھے۔ مہلوکین میں پائلٹ ٹیم کے 3 اراکین بھی شامل ہیں۔ افسران کا کہنا ہے کہ یہ حادثہ کمچاتکا علاقہ میں ہوا جو ایک قدیم جزیرہ ہے۔ وہاں کئی شعلہ فشاں ہیں۔ یہ علاقہ اپنی خوبصورت اور گھنے جنگلوں کے لیے مشہور ہے۔

قابل ذکر ہے کہ ہفتہ کے روز 19 مسافروں اور پائلٹ ٹیم کے 3 اراکین کے ساتھ ایک ایم آئی 8 ہیلی کاپٹر نے واچکاجیتس شعلہ فشاں کے قریب سے پرواز بھری تھی، لیکن پرواز بھرنے کے کچھ دیر بعد ہی وہ حادثہ کا شکار ہو گیا۔ اگلے دن، یعنی اتوار کو ہیلی کاپٹر کا ملبہ ملا جو انتہائی ٹوٹ پھوٹ والی حالت میں تھا۔ روس کی ایک خبر رساں ایجنسی نے ایمرجنسی وزارت کا حوالہ دیتے ہوئے بتایا کہ شاید یہ حادثہ خراب موسم میں ٹھیک سے دکھائی نہ دینے کے سبب ہوا ہے۔

روس کے سینئر لاء انفورسمنٹ باڈی کی شاخ نے پیر کے روز ایک بیان میں کہا کہ اس حادثے کی تحقیقات شروع کر دی گئی ہے۔ بتایا جاتا ہے کہ ہیلی کاپٹر کے پرخچے ایک بڑی جنگلی پہاڑی کی چوٹی کے قریب ڈھلان پر دیکھا گیا تھا۔ ایمرجنسی وزارت نے جانکاری دیتے ہوئے بتایا تھا کہ بچاؤ ٹیم نے کیمپ لگا کر لوگوں کو تلاش کرنا شروع کیا تھا۔ حالانکہ اب اس بات کی تصدیق ہو چکی ہے کہ ہیلی کاپٹر پر سوار سبھی 22 افراد ہلاک ہو گئے ہیں اور ان کی لاشیں بھی برآمد کر لی گئی ہیں۔