کورونا سے بے حال امریکہ نے بھی پلازمہ تھیراپی استعمال کرنے کا کیا فیصلہ

واشنگٹن: امریکی محکمہ فوڈ اینڈ ڈرگ ایڈمنسٹریشن (ایف ڈی اے) نے کورونا وائرس کووڈ- 19 سے شدید بیمار مریضوں کے علاج کے لئے ہنگامی حالات میں پلازمہ تھریپی کی منظوری دے دی ہے۔ امریکی صدر ڈونالڈ ٹرمپ نے پیر کو وائٹ ہاؤس میں پریس کانفرنس ککے ذریعہ یہ اطلاع دی۔

ڈونالڈ ٹرمپ نے کہا کہ ’’میں طویل عرصہ سے پلازمہ تھریپی کی منظوری دلانے کے لئے کام کر رہا تھا۔ آج چینی وائرس کے خلاف ہماری لڑائی کے حوالے سے یہ تاریخی اعلان کرتے ہوئے مجھے بہت خوشی ہو رہی ہے۔ اس سے بہت ساری زندگیاں بچ جائیں گی۔ ‘‘ امریکی صدر نے کہا کہ تحقیق سے پتہ چلا ہے کہ پلازمہ تھریپی سے کورونا مریضوں کی اموات کی شرح 35 فیصد تک کم ہوسکتی ہے۔

ڈونالڈ ٹرمپ نے کورونا وائرس سے صحت یاب ہونے والے امریکی عوام سے بڑھ چڑھ کر پلازمہ عطیہ کرنے کی بھی اپیل کی ہے۔ ایف ڈی اے نے کہا کہ تحقیق سے پتہ چلا ہے کہ اگر کورونا وائرس سے متاثر مریض کو اسپتال میں داخل ہونے کے تین دن کے اندر پلازمہ تھراپی دی جاتی ہے تو اس سے مریض کی بہتری کے امکانات بڑھ جاتے ہیں۔ ایف ڈی اے نے کہا کہ اس نے حالیہ مہینوں میں جمع اعداد و شمارکے جائزہ کی بنیاد پر ہی پلازمہ تھریپی کی منظوری دی ہے۔ اب تک امریکہ میں 70 ہزار سے زائد کورونا مریضوں پر پلازمہ تھریپی کا تجربہ کیا جا چکا ہے۔

قابل غور ہے کہ اس وبا نے امریکہ میں سنگین شکل اختیار کرلی ہے اور اب تک کورونا وائرس نے 57 لاکھ سے زائد افراد کو متاثر کیا ہے۔ امریکہ کی جان ہاپکنز یونیورسٹی کے سینٹر فار سائنس اینڈ انجینئرنگ سینٹر (سی ایس ایس ای) کے جاری کردہ تازہ ترین اعداد و شمار کے مطابق امریکہ میں کورونا وائرس متاثرین کی تعداد 57 لاکھ سے تجاوز کرکے 5700487 ہوگئی ہے، جبکہ اس وبا سے ہلاکتوں کی مجموعی تعداد 176797 ہوگئی ہے۔