بنگلہ دیش کی سابق وزیر اعظم خالدہ ضیا اسپتال میں داخل، کئی بیماریوں سے نبرد آزما

بنگلہ دیش کی سابق وزیر اعظم خالدہ ضیا کی طبیعت خراب ہو گئی ہے، جس کے بعد انھیں جمعرات کی علی الصبح ایک پرائیویٹ اسپتال میں داخل کرایا گیا۔ ایک میڈیا رپورٹ میں اس تعلق سے جانکاری دیتے ہوئے بتایا گیا کہ بی این پی میڈیا سیل کے رکن سیر الکبیر خان کے حوالے سے بتایا کہ بنگلہ دیش نیشنلسٹ پارٹی (بی این پی) کی سربراہ 79 سالہ خالدہ ضیا اپنی رہائش سے تقریباً 1.40 بجے ’ایورکیئر اسپتال‘ پہنچیں جہاں ان کی کئی طرح کی جانچ کرائی گئی اور اب رپورٹ کا انتظار ہے۔

خالدہ ضیا کے ڈاکٹر پروفیسر اے زیڈ ایم زاہد حسین نے کہا کہ میڈیکل بورڈ نے کئی ٹیسٹ کرانے کی ہدایت دی گئی ہے اور اسپتال میں داخل ہونے کے بعد انھیں ایک پرائیویٹ کیبن میں رکھا گیا ہے۔ انھوں نے مزید کہا کہ ٹیسٹ کے ریزلٹس کو ریویو کرنے کے بعد آگے علاج کیا جائے گا۔

قابل ذکر ہے کہ 21 اگست کو خالدہ ضیا اسی اسپتال سے 45 دنوں تک علاج کرا کر گھر لوٹی تھیں۔ سابق وزیر اعظم گزشتہ پانچ سالوں سے گھر میں نظر بند بھی تھیں۔ انھیں 6 اگست کو بنگلہ دیش کے صدر محمد شہاب الدین کے حکم پر رِہا کر دیا گیا تھا۔ 5 اگست کو ان کی سخت حریف شیخ حسینہ کی قیادت والی عوامی لیگ حکومت گر گئی تھی، جس کے بعد انھیں ان کے خلاف سبھی الزامات سے بری کر دیا گیا تھا۔

بی این پی چیف طویل مدت سے کئی طرح کی بیماریوں سے نبرد آزما ہیں۔ مثلاً انھیں لیور سیروسس، ذیابیطس، گردہ، پھیپھڑا، قلب اور آنکھوں سے متعلق کئی طرح کے مسائل کا سامنا ہے۔ ماہر ڈاکٹروں کے ایک گروپ کے ذریعہ 23 جون کو ان کے سینے میں ’پیس میکر‘ لگایا گیا تھا۔ نومبر 2021 میں لیور سیروسس کا پتہ چلنے کے بعد سے ان کے ڈاکٹر انھیں بیرون ملک بھیجنے کا مشورہ دے رہے ہیں۔