امریکہ: ٹرمپ نے 716 ارب ڈالر کے ریکارڈ دفاعی بجٹ پر دستخط کیا

امریکی دارالحکومت واشنگٹن سے منگل چودہ اگست کی صبح ملنے والی نیوز ایجنسی روئٹرز کی رپورٹوں کے مطابق ڈونلڈ ٹرمپ نے 2019ء کے لیے ملکی دفاعی بجٹ کی دستاویز پر دستخط نیو یارک سے قریب 400 کلومیٹر شمال مغرب کی طرف واقع فورٹ ڈرم نامی امریکی فوجی اڈے پر کیے۔

ٹرمپ نے اگلے برس کے لیے دفاعی اخراجات سے متعلق اس قانونی دستاویز پر دستخط کرنے کے بعد کہا، ’’یہ بجٹ ہماری فوج اور ہمارے فوجیوں کی جدید تاریخ میں اہم ترین سرمایہ کاری ہے۔‘‘ روئٹرز کے مطابق ان رقوم سے دیگر شعبوں کے علاوہ امریکی فوج کے پرانے ٹینکوں، جنگی طیاروں اور پرانے بحری جہازوں کی جگہ زیادہ جدید ماڈل متعارف کرائے جائیں گے۔

اس کے علاوہ امریکی فوج کی نفری میں انہی رقوم سے مزید پندرہ ہزار چھ سو فوجیوں کا اضافہ بھی کیا جائے گا۔ آئندہ برس کے لیے اب قانون کی شکل اختیار کر جانے والے اس دفاعی بجٹ کے مطابق امریکی فوج کے اہلکاروں کی تنخواہوں میں 2019ء سے 2.6 فیصد کا اضافہ بھی کر دیا جائے گا۔

ترکی کو جنگی طیاروں کی فراہمی پر پابندی

نیوز ایجنسی ڈی پی اے نے لکھا ہے کہ صدر ڈونلڈ ٹرمپ کی طرف سے دستخطوں کے بعد آئندہ برس کے لیے جو سالانہ امریکی دفاعی بجٹ اب قانون بن گیا ہے، اس میں مغربی دفاعی تنظیم نیٹو کے ایک اہم رکن ملک ترکی کو جنگی طیارے فراہم کرنے پر پابندی بھی لگا دی گئی ہے۔

دفاعی بجٹ سے متعلق اس قانون کے تحت ترکی کو امریکا کی طرف سے آئندہ ایف پینتیس طرز کے جدید ترین جنگی طیاروں کی ترسیل ممنوع ہو گی۔ اس پابندی کی وجہ امریکا اور ترکی کے مابین ایک دوسرے کے روایتی حلیف ہونے کے باوجود اس وقت پائی جانے والی وہ شدید کشیدگی ہے، جس کا سبب ترکی میں ایکی امریکی پادری کی گرفتاری بنی ہوئی ہے۔

اس امریکی پادری کا نام اینڈریو برنسن ہے اور اسے ترکی میں اپنے خلاف دہشت گردی کے الزامات کا سامنا ہے۔ امریکا اپنے اس شہری اور کلیسائی شخصیت کی رہائی کے لیے کئی مرتبہ ترکی سے براہ راست مطالبے کر چکا ہے، جن پر عمل درآمد نہ کیے جانے کی وجہ سے واشنگٹن نے ترکی کے خلاف متعدد اقدامات بھی کیے ہیں۔

انہی میں سے ایک صدر ٹرمپ کی وہ حالیہ ٹویٹ بھی تھی، جس میں انہوں نے کہا تھا کہ ’ترکی اور امریکا کے تعلقات اس وقت اچھے نہیں ہیں۔‘‘ اس کے علاوہ ڈونلڈ ٹرمپ نے ترک فولادی مصنوعات کی امریکا درآمد پر اضافی محصولات بھی عائد کر دیے تھے۔ اسی وجہ سے گزشتہ کئی ماہ سے اپنی قدر میں کمی کا سامنا کرنے والی ترک کرنسی لیرا کی قدر گزشتہ ہفتے صرف ایک دن میں قریب 20 فیصد کم بھی ہو گئی تھی۔ اس بجٹ قانون کے تحت صدر ڈونلڈ ٹرمپ نے امریکا کے روس کے ساتھ فوجی شعبے میں تعاون کو بھی محدود کر دیا ہے۔

امریکی خلائی فوج کے قیام کا منصوبہ

فورٹ ڈرم کے امریکی فوجی اڈے پر بجٹ قانون پر دستخط کرنے کے بعد صدر ڈونلڈ ٹرمپ نے ایک امریکی ’اسپیس فورس‘ کے قیام کے اپنے منصوبے کا دفاع کرتے ہوئے یہ بھی کہا، ’’آسمانوں، زمین اور سمندروں کی طرح خلا بھی اب ایک میدان جنگ بن چکا ہے۔‘‘ امریکی صدر کے مطابق ’’ہم اپنی اس اسپیس فورس کو امریکی دفاعی افواج کا چھٹا بازو اور خلا میں امریکا کے اپنے حریف ممالک پر عسکری غلبے کو یقینی بنائیں گے۔‘‘

روئٹرز کی رپورٹوں کے مطابق ٹرمپ کا 716 ارب ڈالر (627 ارب یورو) کا یہ سالانہ دفاعی بجٹ اپنی مالیت میں ریکارڈ حد تک زیادہ ہے لیکن واشنگٹن میں عسکری اور بین الاقوامی علوم کے مرکز کے مطابق عملی طور پر ٹرمپ کے پیش رو اوباما کے پہلے دور صدارت کے شروع کے تین برسوں کے دوران پیش کیے گئے تینوں سالانہ دفاعی بجٹ اپنی اپنی مالیت میں 2019ء کے ڈیفنس بجٹ سے زیادہ تھے۔