برطانیہ میں روسی سفارت کاروں پر کارروائی، روس کی دھمکی

اقوام متحدہ/ماسکو: برطانیہ میں سابق روسی جاسوسی سرگئی اسکرپل کی موت کے بعد اب دونوں ممالک کے درمیان تعلقات کشیدہ ہو چکے ہیں۔ برطانیہ کی وزیر اعظم ٹریسا مئے نے روس پر الزام عائد کیا ہے کہ برطانیہ کی سرزمین پر اس نے کیمیائی ہتھیار کا استعمال کرتے ہوئے روس کے ایک سابق ایجنٹ کو مارنے کی کوشش کی۔ اس پر روس سے جواب طلب کیا گیا تھا لیکن روس نے جواب نہیں دیا۔ آخر کار برطانیہ نے 23 سفارتکاروں کو ملک بدر کرنے کا حکم جاری کر دیا۔

اپنے سفارتکاروں کی ملک بدری کے بعد روس آگ بگولہ ہو گیا ہے اور روس کا کہنا ہےکہ برطانیہ کی جانب سے روسی سفارت کاروں کو جاسوس قرار دینے اور ملک بدر کرنے کا جلد جواب دیا جائے گا۔ ادھر امریکہ نے سلامتی کونسل سے روس کے خلاف کارروائی کا مطالبہ کردیا۔ برطانیہ کی وزیر اعظم کے فیصلے کے بعد اقوام متحدہ کی سلامتی کونسل کا ہنگامی اجلاس طلب کیا گیا تھا۔

اجلاس میں برطانوی سفیر نے الزام عائد کیا کہ اعصابی گیس کا حملہ ریاستی پشت پناہی میں کیا گیا۔ امریکی سفیر نکی ہیلی نے کہا کہ روس کو اپنے اعمال کا حساب دینا ہوگا۔ الزامات مسترد کرتے ہوئے روسی سفیر کا کہنا تھا کہ اشتعال انگیز حملہ الیکشن سے پہلے روس کی ساکھ متاثر کرنے کےلیے کیا گیا، برطانیہ کیمیائی مادہ روس کو فراہم کرے۔

دریں اثنا برطانیہ کی جانب سے سفارتکاروں کی برطرفی کی کارروائی پر روسی وزیر خارجہ کو برطانیہ کا دورہ کرنے کی دعوت واپس لینے کے حوالہ سے روسی وزارت خارجہ کی ترجمان ماریا نے اپنے فیس بک پیج پر لکھا ہے ’’مئے نے لاؤوروف کو برطانیہ کا دورہ کرنے کی دعوت واپس لے لی ہے۔ لیکن انھوں (لاؤورف) نے یہ دعوت قبول ہی نہیں کی تھی۔‘‘

برطانیہ نے 14 مارچ کو روس کے 23 سفارت کاروں کو نکالنے کا فیصلہ کیا ہے۔ برطانیہ نے یہ فیصلہ روسی جاسوس کو زہر دینے کے معاملے میں روس کی طرف سے وضاحت دینے سے انکار کرنے کے بعد کیا ہے۔ سرد جنگ کے بعد گزشتہ 30 برسوں میں اب تک کی یہ سب سے بڑی سفارتی بے دخلی ہے۔ وزیر اعظم کے اس فیصلے کے بعد ہی اقوام متحدہ کی سلامتی کونسل میں ہنگامی میٹنگ بلائی گئی۔ ان 23 سفارتکاروں کو برطانیہ چھوڑنے کے لئے ایک ہفتے کا وقت دیا گیا ہے۔

برطانوی وزیر اعظم ٹریسا مئے کا کہنا ہے کہ انگلینڈ میں سابق ایجنٹ کو دیا گیا جنگی نوعیت کا اعصاب شکن مادہ روس میں بنا ہے جبکہ امریکہ نے بھی اس واقعہ میں روس کے ملوث ہونے کی تائید کی ہے اور ناقابل قبول قرار دیا تھا۔

برطانوی وزیر اعظم ٹریسا مئے نے پارلیمنٹ کو بتایا تھا کہ ’عین ممکن‘ ہے کہ انگلینڈ میں سابق روسی ایجنٹ اور ان کی بیٹی کو روس میں تیار کردہ فوجی گریڈ ’اعصاب کو متاثر کرنے والا‘ کیمیائی مادہ دیا گیا ہو۔

اس کے علاوہ برطانیہ نے روس کے خلاف دوسرے اقدامات کے طور پر 23 سفارتکاروں کو ملک چھوڑنے کے لیے ایک ہفتے کا وقت دینے کے علاوہ نجی پروازوں، کسٹمز اور کارگو کی مزید سخت نگرانی کی جائے گی اور روسی ریاستی اثاثے منجمد کیے جائیں گے جن کے حوالے سے شواہد ہیں کہ برطانیہ کے لیے خطرہ ہیں۔ وزرا اور شاہی خاندان روس میں ہونے والے فیفا ورلڈ کپ کا بائیکاٹ کریں گے اور روس کے ساتھ اعلیٰ سطح کے باہمی روابط معطل کرنے کا فیصلہ لیا گیا ہے۔

(یو این آئی ان پٹ کے ساتھ)