آذربائیجان: تیل ڈپو دھماکہ میں مہلوکین کی تعداد 125 پہنچی

آذربائیجان کے نارگونو-کاراباخ واقع ایک تیل ڈپو میں گزشتہ روز ہوئے دھماکہ میں مہلوکین کی تعداد لگاتار بڑھتی جا رہی ہے۔ تازہ ترین خبروں کے مطابق اب تک 125 لوگوں کی موت ہو چکی ہے جبکہ سینکڑوں زخمیوں کا اب بھی اسپتال میں علاج چل رہا ہے۔

قابل ذکر ہے کہ کاراباخ کے افسران نے منگل کی صبح 20 لوگوں کے ہلاک ہونے کی خبر دی تھی۔ حالانکہ اس کے بعد متاثرین کی تعداد میں تیزی کے ساتھ اضافہ ہوا۔ یہ حادثہ اس وقت پیش آیا جب اس علاقے کو چھوڑ کر جا رہے وہاں کے باشندے اپنی کاروں میں تیل بھروانے کے لیے قطار میں کھڑے تھے۔

اس درمیان ارمینیائی وزارت صحت کا کہنا ہے کہ کاراباخ کی راجدھانی اسٹیپاناکارٹ کے پاس ہوئے دھماکہ میں مارے گئے لوگوں کی لاشوں کو آرمینیا لے جایا گیا ہے۔ اس سے قبل منگل کو ریڈ کراس کی بین الاقوامی کمیٹی (آئی سی آر سی) نے کہا تھا کہ دھماکہ کے سبب سینکڑوں افراد جھلس گئے ہیں۔

واضح رہے کہ علاقہ میں تین دہائیوں تک علیحدگی پسندوں کی حکومت رہی۔ گزشتہ ہفتہ آذربائیجان کی فوج کے ذریعہ مہم چلا کر علاقے پر مکمل دعویٰ کرنے کے درمیان ہزاروں کی تعداد مین نارگونو-کاراباخ باشندہ ہجرت کر آرمینیا پہنچ رہے ہیں۔ اسی درمیان تیل ڈپو میں زبردست دھماکہ کا یہ واقعہ پیش آیا۔