آسٹریلیا: ایک بار پھر سوامی نارائن مندر میں توڑ پھوڑ، خالصتان حامیوں نے دروازے پر خالصتانی پرچم لہرایا

آسٹریلیا میں ایک بار پھر مندر میں خالصتان حامیوں کے ذریعہ توڑ پھوڑ کا واقعہ پیش آیا ہے۔ یہ توڑ پھوڑ مغربی سڈنی کے روجہل علاقہ میں موجود باپس سوامی نارائن مندر میں کی گئی ہے۔ میڈیا رپورٹس کے مطابق جمعہ کی صبح باپس سوامی نارائن مندر پر خالصتان حامیوں نے حملہ کیا اور مندر کی دیوار کو نقصان پہنچایا۔ شرپسندوں نے مندر کے دروازے پر خالصتان کا پرچم بھی لٹکا دیا تھا۔

آسٹریلیائی میڈیا میں آ رہی خبروں کے مطابق روجہل علاقہ کے باپس سوامی نارائن مندر میں جب مندر انتظامیہ کے لوگ جمعہ کے روز پوجا کرنے کے لیے پہنچے تو دیکھا کہ مندر کی دیوار ٹوٹی تھی اور دروازے پر خالصتان کا پرچم بھی لٹکا ہوا تھا۔ بتایا جاتا ہے کہ پرمپٹا رکن پارلیمنٹ اینڈریو چارلٹن کو جیسے ہی واقعہ کی خبر ملی، وہ مندر پہنچے۔ چارلٹن نے مندر کے افسران کے ساتھ دیوار کو پھر سے رنگنے میں مدد کی۔ انھوں نے کہا کہ میں اس واقعہ سے بہت غمزدہ اور حیران ہوں۔ انھوں نے لوگوں سے امن بنائے رکھنے کی اپیل کی اور ساتھ ہی مقامی پولیس، محکمہ امور داخلہ، ہندوستانی ہائی کمیشن اور سڈنی کے قونصلیٹ جنرل کی حمایت کی تعریف کی۔

واضح رہے کہ اس سے پہلے بھی کئی بار آسٹریلیا میں مندروں کو ہدف بنایا جا چکا ہے۔ رواں سال کے شروع میں بھی ملبورن میں تین اور برسبین میں دو ہندو مندروں میں خالصتان حامیوں کے ذریعہ توڑ پھوڑ کی گئی تھی۔ جنوری مین ملبورن میں باپس سوامی نارائن مندر میں توڑ پھوڑ کا واقعہ پیش آیا تھا۔ 12 جنوری کی صبح ملبورن کے شمالی شہر مل پارک میں باپس سوامی نارائن مندر میں خالصتان حامیوں نے توڑ پھوڑ کی تھی۔ ساتھ ہی مندر کی دیواروں پر اشتعال انگیز نعرے بھی لکھے گئے تھے۔