پاکستان کو لگا جھٹکا، امریکہ نے ویزا کی مدت 5 سے گھٹا کر کی 1 سال، فیس بھی بڑھائی

امریکہ نے پاکستان کو ایک بڑا جھٹکا دیا ہے جسے ہندوستانی دباؤ کا نتیجہ قرار دیا جا رہا ہے۔ ذرائع کے مطابق پاکستان پر ہندوستانی دباؤ کے درمیان امریکہ نے پاکستانی شہریوں کے لیے ویزا کی مدت 5 سال سے گھٹا کر ایک سال کر دی ہے۔ امریکہ کے اس فیصلے کا یہ مطلب ہے کہ اگر کوئی پاکستانی شہری اب امریکہ جاتا ہے تو اسے صرف ایک سال کا ویزا ملے گا۔ گویا کہ ایک سال کے بعد اسے یا تو واپس لوٹنا پڑے گا یا پھر ویزے کو دوبارہ ریونیو کرانا ہوگا۔ امریکہ کے اس قدم سے پاکستانی شہریوں کے لیے مشکلوں میں اضافہ ہو گیا ہے۔

میڈیا ذرائع کے مطابق امریکہ نے پاکستان کی چار کیٹگری میں سے تین کیٹگری کے ویزا کی مدت پانچ سال سے گھٹا کر ایک سال کر دی ہے جب کہ ایک کیٹگری کے ویزا کی مدت گھٹا کر 3 مہینے تک محدود کر دی گئی ہے۔ تین مہینے کا ویزا میڈیا سیکٹر کو دینے کا فیصلہ لیا گیا ہے۔ علاوہ ازیں پاکستانیوں کو ویزا کے لیے اب زیادہ رقم بھی دینا پڑے گا۔ خبروں کے مطابق ایچ، ایل اور آر کیٹگری کے لیے فیس میں 38 ڈالر کا اضافہ کیا گیا ہے جب کہ صحافی اور میڈیا کے لیے آئی کیٹگری میں 32 ڈالر کا اضافہ کیا گیا ہے۔ اضافہ شدہ فیس کے بعد پاکستانی صحافیوں کو امریکہ کا ویزا حاصل کرنے کے لیے 192 ڈالر ادا کرنے ہوں گے۔

دراصل پلوامہ حملے کے بعد ہندوستان لگاتار پاکستان کے خلاف دباؤ بنانے کے لیے مختلف ممالک سے رابطہ میں ہے۔ خبروں کے مطابق ہندوستان کی یہ کوشش ہے کہ پاکستان کو بین الاقوامی منظرنامے پر الگ تھلگ کر دیا جائے تاکہ اس کی زمین سے دہشت گرد گروپوں کا صفایا کرنے میں مدد مل سکے۔ ہندوستان لگاتار پاکستان سے دہشت گرد گروپوں کے خلاف کارروائی کا مطالبہ بھی کر رہا ہے اور یہی سبب ہے کہ جیش محمد کے بیٹے اور کچھ رشتہ داروں سمیت 44 لوگوں کو گرفتار بھی کیا گیا ہے۔

قابل ذکر ہے کہ ہندوستان نے پاکستان کے خلاف 26 فروری کو ائیر اسٹرائیک کیا تھا اور اس کے اگلے ہی دن پاکستان نے ایف 16 جنگی طیارہ سے ہندوستانی علاقے میں بم اندازی کی تھی۔ ایف 16 کا استعمال پاکستان کے لیے مناسب نہیں تھا اور اس کی جانچ امریکہ بھی کر رہا ہے۔ گویا کہ پاکستان پر امریکہ نے اپنی جانب سے پابندیاں لگانی شروع کر دی ہیں جو اس ملک کے لیے پریشانی کا سبب بن رہا ہے۔