چینی وزیر خارجہ کے بعد اب وزیر دفاع بھی غائب!

چین کے وزیر خارجہ کنگ گینگ طویل وقت سے دکھائی نہیں دیے ہیں اور یہ معاملہ کئی اخبارات کی سرخیاں بن چکا ہے۔ اب ایسی خبریں سامنے آ رہی ہیں کہ چینی وزیر دفاع لی شانگ فو بھی گزشتہ کچھ دنوں سے غائب ہیں۔ یہ دعویٰ جاپان میں امریکی سفیر ریہم امینوئل نے سوشل میڈیا پلیٹ فارم ’ایکس‘ پر کیا ہے۔

اپنی سوشل میڈیا پوسٹ میں امینوئل نے لکھا ہے کہ گزشتہ دو ہفتہ سے چینی وزیر دفاع کو نہیں دیکھا گیا ہے۔ دعویٰ کیا جا رہا ہے کہ انھیں آخری بار افریقہ چائنا پیس اینڈ سیکورٹی فورم میں دیکھا گیا تھا۔ بیجنگ میں منعقد اس تقریب میں لی شانگ فو نے اپنی تقریر کی تھی۔ شانگ فو کو مارچ 2023 میں ہی وزیر دفاع مقرر کیا گیا تھا، یعنی ابھی انھیں وزیر بنے محج 6 ماہ ہی ہوئے ہیں۔