بنگلہ دیش: ایک فیکٹری میں لگی زبردست آگ سے 52 افراد ہلاک، درجنوں زخمی

بنگلہ دیش کے نارائن گنج ضلع میں ایک جوس فیکٹری میں لگی زبردست آگ میں مرنے والوں کی تعداد بڑھ کر 52 ہو گئی ہے۔ ایک اعلیٰ افسر نے اس سلسلے میں جانکاری دی اور کہا کہ درجنوں افراد اس آتشزدگی واقعہ میں زخمی ہو گئے ہیں۔ ’ڈھاکہ ٹریبیون‘ کی خبر کے مطابق اس حادثے میں 50 سے زائد لوگ جھلس گئے۔ اس آگ سے بچنے کی کوشش میں کئی مزدور عمارت سے بھی کود گئے۔

فائر بریگیڈ سروس اور شہری تحفظ کے ڈپٹی ڈائریکٹر دیباشیش بردھن نے بی ڈی نیوز 24 سے بتایا کہ ’’ہماری تلاش ابھی جاری ہے۔ یہ پتہ لگایا جا رہا ہے کہ کہیں اور کوئی مزدور یا لاش اندر پھنسا ہوا تو نہیں ہے۔‘‘ نارائن گنج فائر بریگیڈ سروس کے ڈپٹی اسسٹنٹ ڈائریکٹر عبداللہ الریفن نے جمعہ کو کہا کہ لاشوں کو پوسٹ مارٹم کے لیے ڈھاکہ میڈیکل کالج اسپتال بھیج دیا گیا ہے۔

خبروں کے مطابق کرنگوپ علاقے میں مختلف جوس، ٹھنڈا شربت اور خوردنیا اشیاء مینوفیکچر کرنے والی ہاشم فوڈس لمیٹڈ کی فیکٹری میں جمعرات کی شام تقریباً 5.30 بجے آگ لگ گئی۔ آگ لگنے کے فوراً بعد تین خاتون مزدوروں کی موت کی اطلاع ملی۔ حالانکہ جمعہ کی صبح آگ پر تقریباً قابو پا لیا گیا تھا، لیکن صبح پانچویں اور چھٹی منزل پر ایک بار پھر آگ لگ گئی۔ آگ کی زبردست گرمی کے سبب عمارت میں دراڑیں آ گئیں۔ الیومینیم کے ڈھانچے سمیت کئی کھڑکیاں ٹوٹ گئیں جس سے کارخانے سے نکلنے والے کالے دھوئیں کے غبار اڑ رہے تھے۔ ہاشم فوڈس لمیٹڈ کے افسران نے ابھی تک ان مزدوروں کی صحیح تعداد کا انکشاف نہیں کیا ہے جو آگ لگنے کے وقت کارخانے کے اندر تھے۔